【保寶達人】保險中介人牌照收費略減 一次過申請三年最優惠

保險中介人牌照收費有最新消息！喺保險行業團體力爭之下，保監局敲定會略為減低牌照新收費，而且新增更具靈活性嘅不同年期收費安排。

保監局喺早前嘅諮詢文件入面列出新牌照收費，以保險從業員一般要有嘅牌照為例，每三年要畀$2,100牌照費，大幅高於保監接管前，每三年嘅$480。

加成3倍有多，份諮詢文件當然引起好大迴響，於是有保險行業團體就發起業界問卷調查，反應非常踴躍，短時間內就收到3,200個回覆，當中絕大多數業界（98.5%）都認為新收費過高，另外有過半數人（53%）不同意逐年收取費用，反映可以有更多年期選擇。

發起調查嘅香港人壽保險從業員協會（保協）積極以調查結果向保監局反映業界聲音，加上一輪磋商，最近終於得到保監局回覆，成功為業界爭取略為調低牌照費用，每三年費用會由$2,100減到$1,900。

據保協透露，新申請牌照人士可以揀申請一年、兩年或三年，一次過申請三年牌最優惠，如果只係申請一年，年費會比申請三年貴15%。講真有心加入保險業發展，三年期肯定係最好嘅選擇。

至於現有牌照持有人續牌，同樣有得揀年期，有兩年或三年供選擇，如果只續兩年，每年平均費用會比續三年貴10%左右，咁只係爭少少，相信大部分舊人都會揀續三年。

據保協指，以上資料尚未經過立法會會議通過，最終結果要以立法會會議通過為準，但係初步得到局方正面回應，都算係做到嘢啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。