惡劣天氣搞到屋企爆玻璃、漏水 家居保險保唔保？

颱風韋帕襲港期間，天文台一度發出十號颶風信號，全港停擺。呢個「超強颱風」令唔少市民嘅安樂窩都受到影響，有啲係玻璃窗爆裂，有啲係天花不停滴水。每逢颱風季節，香港人都會特別緊張，因為一個颱風就可能令我哋嘅安樂窩出現各種意外同損失。今次就同大家講解下，點樣透過家居保險喺惡劣天氣來襲時都可以安心啲。

首先大家要明白，家居保險唔係咩都保、乜都有得賠。要獲得賠償，前提係做好風險管理，即係防風措施。大家可能會問：「咁我點知自己做咗嘅防風措施夠唔夠？」其實好簡單，最基本就係收好所有露台或者窗台嘅雜物，將所有窗戶關好、鎖實。如果你已經做齊呢啲措施，但仍然發生意外，咁就大有機會獲得賠償。

講返賠償範圍，一般嚟講，固定裝置如果因為颱風受損，例如原裝嘅玻璃窗爆裂、天花漏水導致裝修損毀等，都在保障範圍之內。就以吹爆玻璃窗為例，如果隻窗本身係原裝未經改動，一般會被視為樓宇結構一部分而被列入「火險」嘅保障範圍；但如果隻窗曾經改過或更換，就會被視為「自置裝修」，咁就屬於家居保險嘅保障範圍，可以從家居保險索償。不過點都好，大家都要緊住一點，如果係因為自己疏忽，好似出街唔記得關窗，咁可能會影響保障。所以大家要記住一個原則，就係可預防嘅損失要盡量預防。

至於水浸問題相信係另一個受關注嘅議題。如果打風過後發現屋企水浸，令到電器或者傢俬損壞，首次你要睇返投保嘅家居保險係咪保天災或極端天氣而引致嘅水浸，如果保嘅，你應該即刻影相、錄影作為證據，然後第一時間通知保險公司。千祈唔好貪快自己去維修，因為保險公司可能會要求佢哋嘅維修商嚟睇過先作決定。

仲有一個保障問題，就係「第三者責任」。假設你嘅冷氣機、玻璃窗因為颱風鬆脫，跌落街整親人或者損壞人哋嘅財物，家居保險入面嘅「第三者責任保障」就可以提供相關保障。有啲保險計劃嘅賠償金額仲可以去到千萬級數添。不過要提提大家，呢個保障只適用於固定裝置，如果係你放喺露台嘅盆栽跌落街，就未必包得到。

提到露台，喺呢度想特別提提住村屋嘅朋友，因為村屋所處嘅地理位置通常比較開揚，較易受颱風影響，所以投保嘅時候要揀啱自己嘅家居保險。一般家居保險未必包括村屋特有嘅設施，例如天台嘅固定裝置、戶外設備等。建議大家揀保險嘅時候要睇清楚保障範圍，必要時可以加購額外保障。

最後想同大家分享一個小貼士：千祈唔好等到天文台發出颱風信號先至去買保險！因為保險公司會將之視為「已知風險」，唔會承保該次颱風帶嚟嘅損失。所以家居保險係一定要及早準備，寧願買咗用唔著，都好過臨急抱佛腳。

其實家居保險唔單只係一份文件，更係一份安心保證。只要大家做好該做嘅預防措施，保險就會喺最需要嘅時候幫到大家。希望大家睇完今次分享之後，都可以及早準備，為屋企添加保障。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。