【保寶達人】香港保險市場的另類「成熟」表現

大家都知香港保險業發展十分成熟，保險深度排名世界第一，保險密度排名世界第二、亞洲第一。不過，原來業界有另一種「成熟」，亦開始受到關注……

根據保監局嘅持牌個人保險中介人年齡統計及數據分析（下圖），中介人嘅年齡中位數，喺過去幾年跨過咗「中年」門檻。喺2020年12月，持牌個人保險中介人平均年齡係39.9歲，到咗2023年10月，唔夠3年平均年齡升到42歲，而且趨勢似乎會繼續向上！

再細分，持牌個人保險中介人有分「代理人」同「經紀人」。截至2023年10月，業務代表（經紀人）平均年齡43.8歲，略高於作為個人保險代理人嘅42.1歲。咁最「後生」係邊類中介人呢？原來係由銀行委任嘅業務代表（代理人），平均38.4歲。

香港整體人口高齡化，可能各行各業都面對呢項趨勢。但保險中介人工作同客戶人生規劃息息相關，而家有啲新產品亦都強調傳承，保障同權益可以傳畀客戶嘅下一代，但係經已人到中年嘅中介人，係咪可以繼續服務到客戶下一代呢？

2023年10月嘅持牌保險中介人年齡數據亦顯示，以單一年齡組別計，35-39歲組別經已取代30-34歲，成為佔最大部分嘅年齡組別（16%）。而同一段時期，25-29歲組別就呈明顯下降趨勢。2020年底仲有近15%，係第三多人嘅組別，但截至2023年10月，佔比降到得返唔夠11%，喺各組別中僅排第5。

數據唔會講大話，唔通真係40歲先係黃金事業期嘅開始？20幾歲嘅年輕中介人愈來愈少，係咪反映少咗大學畢業生做保險？又或者各位大隊長喺搵新人方面，傾向優先選擇成熟穩重嘅有經驗人士？

保寶達人就覺得，保險中介人最重要嘅工作，係為客戶提供專業保險顧問服務。40歲左右呢個年紀，工作同人生經驗豐富，處事成熟穩重有責任心，做服務仍然有氣有力，可能係最Fit嘅年紀都唔定呢！唔知大家又有乜睇法呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。