從「睇數」到「管人」 你準備好做一個保險領袖未？

喺保險呢行做到經理級，你覺得衡量成功嘅標準係咩？係每個月睇住個 Dashboard 啲數係咁升、團隊入面多咗幾個 MDRT，定係你帶出嚟嘅人，每一個都係被人讚賞，喺行業走得遠？保監局最近發布咗新一期《監管通訊》，當中有篇文章幾有深度，叫做「當個人保險代理不僅僅是個人保險代理」。呢篇嘢唔係寫畀新人睇嘅入行指引，而係寫畀各位經理嘅一份重要提醒。想大家諗諗「管人」，除咗激勵士氣同教銷售技巧之外，背後仲承擔緊幾多法律同埋規管上嘅責任？

事實上，保險業唔少經理都係由「績優代理人」升上嚟，因為以前個人業績「標青」，所以獲委以重任去帶隊。升職之後，大家自然會將焦點擺晒喺點樣幫下屬簽單、點樣達成公司嘅業績指標，將大部分精力都用嚟「睇數」。如果下屬交到數，唔少經理可能都會「大安旨意」，覺得對方搞得掂，好少會去細查每張保單嘅銷售細節。

不過，保監局喺文章入面就話，當你開始帶領團隊，你嘅身份就已經唔再單純係一個銷售保險嘅代理，你仲係一個「監督者」。如果你淨係識睇業績，而忽視咗對下屬操守嘅監控，你其實係將自己、甚至成個團隊嘅事業，押喺一個隨時會爆嘅炸彈上面。

講到操守與專業，其實保協（LUHK）多年前已經行前咗一步，推出咗「卓越誠信顧問獎項」（MTA）。呢個獎嘅理念，正正同保監局今次強調嘅監管精神吻合。要成為MTA得主，唔係「淨係睇數」，佢要求獲獎者必須兼具卓越業績、高尚品格同埋專業服務，仲要經過公司同客戶嘅推薦先至攞到。過去呢幾年，我哋見到行業入面攞MTA嘅有心人越嚟越多，證明「業績」同「操守」絕對唔係對立，而係可以相輔相成。

另外，保監局喺報告入面又提到一個關鍵，就係經理絕對唔可以「隻眼開隻眼閉」。有時下屬為咗急於求成，可能會喺銷售過程入面同客戶講得唔清唔楚。如果經理因為對方係Top Sales，就對呢啲明顯嘅不當行為視而不見，甚至覺得只要客戶唔投訴就無問題，咁呢位經理就已經係嚴重失職。大家要明白，一旦出咗事，監管機構係絕對唔會接受經理用「我唔知情」嚟做擋箭牌。

所以一句到尾，當行業嘅專業要求越嚟越高，客戶對代理嘅期望亦都增加，大家或者要問返自己，你希望你帶領嘅團隊，係一個只求短期業績嘅戰場，定係一個能夠獲得客戶長期信賴、具備真正傳承價值嘅專業團隊？呢個問題，真係值得深思。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。