醫療費用越嚟越貴 保費加價無可逆轉？

今時今日，當做個小小嘅身體檢查、或者脫走一粒毫不起眼嘅「疣」，都可以變成醫療保險嘅索償項目。大家有冇諗過，呢啲看似微不足道嘅開支，其實正在慢慢重塑我哋嘅醫療保障制度？

根據香港保險業聯會最新調查，本港喺2019至2023年間，整體醫療開支錄得超過6成嘅驚人升幅。最有趣嘅係，喺眾多索償項目當中，竟然係「非緊急程序」如除疣（脫疣）高踞榜首，成為索償宗數最多嘅疾病。

對於有關情況，理大專業及持續教育學院院長阮博文指出，疫情之後醫療支出上升嘅動力，主要來自服務使用量增加，特別係住院保障計劃中嘅日間醫療程序錄得顯著增長。呢類情況好多時屬於選擇性程序，或者係為咗早期檢測而做嘅檢查。

阮院長表示，如果醫療開支繼續依呢個速度增長，將會對僱主及個人負擔私人醫療保險嘅成本構成嚴重壓力。推算落去，5年內成本將上升50%，10年內更會直接翻倍！

假如趨勢持續，保費調整絕對係意料中事。香港保險業聯會醫療保險可持續發展專責小組副主席李紫蘭就話，業界絕對唔希望出現「加保費加到市民負擔唔起，最終導致大批市民放棄購買醫療保險」嘅情況。因為一旦發生呢種情況，唔止會削弱私營醫療喺香港醫療系統嘅角色，更會加劇公營醫療嘅重擔。

同時，李紫蘭亦提到現時自願醫保計劃嘅掣肘：現有條款規定保險公司唔可以減少現有保障，即使業界發現問題，喺現行框架下都難以單方面改善。佢期望喺未來嘅自願醫保改革中，能夠同業界、監管機構及所有持份者共同商討出改善方案。

當然，將來係點無人知，但講返目前保費上升壓力以及醫療開支嘅挑戰，大家又可以點應對呢？對於保險業從業員嚟講，大家可以主動幫客戶檢視保單，例如為部分程序設立較低嘅支出上限或引入共付額，同時加強教育投保人將保障留喺最需要嘅大病之上。至於普羅大眾，大家就應該理性使用醫療資源，避免濫用醫療保險推高整體市場保費。

面對未來保費與醫療開支嘅雙重挑戰，如果我哋繼續樣樣claim盡，到底係幫緊自己，定係親手推高未來嘅醫療成本呢

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。