【保寶達人】打擊向內地客無牌銷售保單 警示不合規銷售模式

內地最新公布會提高來港內地旅客嘅免稅額度，相信會吸引更多內地旅客重臨香港，順道來港投保趨勢亦會升溫，但同時隱藏喺冰山一角之下嘅不合規保險銷售情況又再浮出水面。

相信好多行家都知，香港保險中介人唔可以喺內地直接銷售香港保險產品，唔少呢方面有需求嘅內地客戶就會透過無牌轉介人（俗稱艇仔）獲取相關資訊，再由佢哋安排香港中介人接洽，當然佢哋會向中介人索取轉介費用，有時甚至連客戶亦會要求中介人「回佣」。

今年4月，保監局同廉政公署採取聯合行動，重拳打擊向內地客無牌銷售保單、獲取高額轉介費、虛報客戶年薪及資產等違規行為，拘捕咗一名個人經紀同一名轉介人。呢次行動向市場傳達清晰嘅訊息，會嚴打呢類不合規銷售行為。

首先要分清楚，保險中介人有保險代理（Agent）同保險經紀（Broker）兩種，前者受保險公司監管，一般情況下係唔可以畀折扣個客，或者將佣金分拆畀第三者。至於保險經紀，無論係個人抑或公司，都屬於獨立身份，少咗保險公司規則監管，佢哋只要簽到單就可以喺保險公司度獲得一筆佣金，至於點樣分配呢筆佣金，全屬經紀自己嘅決定。經紀變相做生意嘅「自由度」高好多，所以就會有一啲「踩界」嘅銷售手法。

同無牌艇仔合作喺內地賣香港保險，背後原因離唔開高額佣金，為咗提高銷售額，經紀會將部分佣金支付畀艇仔，聽聞最高可以去到佣金9成咁誇張！其實歸根究柢，呢個現象同保險經紀嘅酬勞結構有關，有行家就認為經紀嘅佣金比率太高，而且多數一次過畀晒。

雖然今次執法行動係針對少數違法者，但有大隊長估計只係一個開始，日後陸續有來，為整個保險行業帶來一次警醒。監管機構將以前一啲存在已久嘅灰色地帶，同埋業內一些具爭議性嘅陋習定義為非法行為，日後違法人士不單會被罰款及停牌，更有機會被刑事檢控，藉此提高阻嚇作用。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。