【保寶達人】你100%咗未？CPD時數不足要停牌？

2023至24年度嘅CPD評核期喺7月31日已經結束，大家係咪已經完成所有CPD時數呢？相信唔少人已經知道，或者好快就會知道，如果時數不足有乜後果。

根據保監局資料，單計2024年1月至5月，因CPD時數不足而受到紀律處分嘅持牌保險中介人超過300個，呢批應該屬於2022-23年度嘅時數不足個案，原來數目都唔少。

喺最新持續專業培訓規定之下，個人持牌人（除旅遊保險代理人外）嘅最低CPD時數要求為每個評核期內最少15個時數，當中要包括最少3個同「道德或規例」有關嘅強制性CPD時數。一年累積15個時數嘅要求唔算好高，而且仲有好多不同形式嘅培訓活動，好似網上虛擬課程都可接納。如果咁都達唔到要求，違規持牌人絕對責無旁貸。

保監局一早講到明，唔好以為時數不足好小事，因為仲有3個月時間（10月31日之前）可以補返，唔會受到紀律處分。事實係個人持牌人截至2024年7月31日嘅CPD 時數不足情況達8小時或以上，唔單止每欠一小時要被罰款600元，仲會暫時吊銷牌照最少3個月！

只有當持牌人截至2024年7月31日嘅不足時數少於8小時，而且喺2024年10月31日前補返足規定時數，先可以避免被暫時吊銷牌照，但都係要畀罰款。

遵守CPD時數要求，係任何一種專業嘅基本要求。保險業成日話要提升專業性，好應該以100%合規為目標，等保監局一個都罰唔到！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。