2025年保險業大變革?稅制改革同你有關?
呢幾日德勤出咗份《2025年全球保險業展望》報告,當中提到幾個令人關注嘅消息,無論你係業界人士定係普羅大眾,都應該了解一下。
講返少少背景,為咗應對數碼化經濟帶嚟嘅侵蝕稅基同轉移利潤(Base Erosion and Profit Shifting, BEPS)風險,經濟合作與發展組織喺2021年公布咗雙支柱解決方案嘅國際稅務改革框架(BEPS 2.0)。其中,BEPS 2.0方案嘅「支柱二」包含就年度綜合收入達 7.5億歐元或以上嘅跨國企業集團實施全球最低稅率。
隨住「支柱二」最低稅率嘅實施,喺低稅率地區開展業務嘅保險公司嘅利潤或會受到影響。因為呢啲大型跨國企業,如果佢哋每年總收入超過7.5億歐元,就要喺每個營運地區至少交15%嘅企業所得稅。
咁香港會點呢?其實特區政府已經宣布會喺2025年實施呢個新稅制。而家有啲保險公司喺香港享受緊稅務優惠,例如專業再保險公司、一般保險同埋持牌保險經紀公司,可能享有8.25%嘅優惠稅率。但係到時候就可能要補返差額,去到最少15%。相信部分保險公司可能會進一步探討企業重組嘅可能性,從而減輕新稅收規則所帶嚟嘅影響。
至於報告入面另一個值得關注嘅項目,就係保險市場的發展預測。報告話,成熟市場嘅壽險保費預計會有1.5%嘅增長。至於內地市場,雖然增長放緩,但今明兩年都預計會有7.2%同5.7%嘅升幅。
另外,喺壽險同年金領域方面,雖然政府同企業嘅養老金支出可能減少,但係新興市場嘅中產階級愈嚟愈多,對儲蓄類產品嘅需求仲會繼續增加,所以保險公司保險企業應該着重提升客戶引導流程同服務質素,配合市場發展。
所以總括嚟講,保險公司有必要重新審視其營運,甚至轉型營運模式,從而喺日益複雜嘅市場環境入面保持競爭力同相關性。至於保險從業員,就要好好留意市場嘅機遇,特別喺因應中產階級嘅需要,為佢哋提供適合嘅建議同方案。至於投保人當然亦都要了解下行業嘅發展,因為各項變化都可能導致保費或者服務條款嘅調整,所以千祈唔好諗住事不關己,就乜都唔理……
保寶達人 – 為您八盡保險天下事
更多保寶達人手記Click Here
任何於本文章的評論或意見純屬來自個別嘉賓/隊長等,並未代表保協之立場。