旅行必睇醫療費用索償懶人包

如果喺旅行期間真係「中招」要睇醫生，第一件事梗係要搵合資格嘅醫生或醫療機構！睇完醫生之後，記住要攞醫生簽署嘅診斷證明同醫療報告。呢啲文件一定要寫清楚你係咩病，做咗咩治療，而所有收據都要好好整理。如果不幸要入院嘅話，記住要攞齊所有住院文件。

第二樣要準備嘅就係旅行證明。機票、酒店預訂資料，連護照出入境蓋印嗰頁最好都影印定。準備齊文件可以令索償過程更加順利。

另外，如果情況允許，大家可以喺當地先同保險公司聯絡。而家啲保險公司都好方便，24小時都有客戶服務熱線。如果要入院或者要做手術，可以先尋求支援，話唔定佢哋仲可以幫你同醫院溝通，等你可以專心休養。

有朋友問我：「買多份旅遊保險有多份保障，係咪更好？」其實要視乎情況。如果份保險嘅醫療費用係實報實銷，就算你買幾多份都係賠返你使咗幾多錢。但如果係以津貼形式發放嘅賠償，好似啲住院津貼、行程delay嘅賠償，買多份就可能會多份保障！不過講到尾，記住要睇清楚條款，因為有啲保單會寫明唔可以重複索償㗎！

最後提提大家，最好喺當地就要執齊文件，以免返到香港先發覺有嘢漏咗。另外，大家要注意返，投保前已有嘅疾病係唔受保㗎，如果有疑問，最好問返保險公司或你哋嘅保險代理人。

希望大家睇完之後，自己記低之餘再同親戚朋友分享，當佢哋touch wood 有需要時都識得點處理，可以安心啲去玩！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。