急症室400蚊只係前奏？ 醫療成本持續加，你準備好未？

踏入2026年，急症室收費由180蚊加到400、普通科門診加足3倍，連以前免費嘅藥物而家都要逐樣計錢——呢一幕幕加價畫面，唔單止係政府帳簿上嘅數字變動，而係正式宣告香港醫療開支進入新時代。以前好多香港人對醫療保險嘅態度係「可有可無」，覺得公營醫院係一個保底，保險只係額外嘅選擇。但隨住收費改革落實，加上專科門診、住院同埋各類掃描檢查全面加價，大家開始要問自己一個好現實嘅問題：喺呢個萬物皆加嘅年代，如果真係有一日要面對大病，你仲有冇能力單靠儲蓄去「硬食」，定係其實醫療保單已經變成人人必備嘅基本配置？

事實上，醫療通脹嘅威力遠遠大過一般通脹。根據業界研究，近年醫療成本升幅已經飆到雙位數水平，直接衝擊緊醫療保險嘅理賠成本同產品嘅可持續性。但由於對公眾嚟講，佢哋關注嘅往往係「保費又加」或者「保障微調」，難免會感到無奈。如果保險從業員喺呢個關鍵時刻，只係當自己係一個「傳聲筒」，咁可能會錯失咗展示自己能力嘅大好時機。

其實醫療加價潮背後，係一個推動客戶「由被動變主動」嘅契機。以前唔少客戶諗醫療保障都好簡單，總係覺得自己後生、買份基本住院就夠。但今時今日，私家醫院嘅手術費同床位費屢創新高，令大家開始明白到，醫療保險唔再係一個買咗放喺度嘅產品，而係財務規劃入面最核心嘅風險管理工具。作為專業顧問，而家正正係教育客戶嘅最好時機，唔係靠嚇去銷售，而係用真實嘅數據同個案，幫客戶睇清楚喺公私營醫療體系之間，佢哋真正想要，亦負擔得起嘅係乜嘢水平嘅醫療體驗，從而調返轉去幫佢哋設計保額同自付額安排。

要喺呢個大環境做好建議，挑戰絕對唔細。醫療保險條款愈嚟愈複雜，由自願醫保（VHIS）細則、手術分級到指定網絡醫生，每一項都需要有人用精準易明嘅說話幫客戶解釋。如果從業員只係照讀計劃書，無能力解釋點樣透過自付額去控制保費，或者點樣平衡保費負擔能力，客戶好容易會覺得保險係一個「無底深潭」。相反，如果從業員可以善用理賠數據分析，引導客戶透過日間手術中心、家庭醫生轉介等方式，喺保障質素之餘同時減低不必要開支，保險就變成咗一個推動高效醫療模式嘅槓桿。

當醫療收費全面上調、通脹長期高企，保險從業員嘅價值，就取決於你係一個傳遞優惠嘅銷售人員，定係一個能夠同客戶一齊規劃方案嘅導航員。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。