保險真係要24小時客服？網民一句話道出真相

啱啱過完農曆新年長假期，唔知大家係去咗旅行定係喺屋企開大餐？我就多咗時間睇手機，發現原來網民嘅留言有時仲精彩過賀歲片。就好似近排有一間虛擬保險公司宣布新動作，發展得好似幾有聲有色，點知下面有一句留言「神回覆」話：「不如留啲 budget 整個星期六日都有人覆嘅 hotline 啦！」睇完呢句，大家會唔會諗諗，到底買保險係買緊方便體驗，定係買緊一份危急時有人聽電話嘅安心？

講真，虛擬保險喺呢幾年確實好似幾受歡迎，標榜性價比同埋快，一個 App 或者網頁撳幾個掣就搞掂，對追求效率嘅人嚟講，的確係吸引。但保險呢樣嘢同買外賣或者網購係有啲唔同，外賣遲到你可以申請退錢，保險作用係萬一你喺禮拜六日發生意外，或者半夜三更急需入院，想搵個人問吓「點樣理賠」嘅時候，你對住個冷冰冰嘅螢幕，或者聽住嗰段不斷輪迴嘅罐頭音樂，嗰陣時你就會發現，慳咗嗰幾百蚊保費，可能係要用你嘅血壓同寶貴時間嚟換嘅。

其實依家喺AI 時代，好多人以為搵理財顧問投保仲係好似以前咁，要特登約出嚟飲茶、填大疊大紙。但現實係依家壽險業都好與時並進，WhatsApp 秒回、視像會議解說、電子簽名，方便程度絕對唔輸畀任何一間虛擬保險公司。分別喺邊？分別在於當你真係有事嗰陣，可以容易啲搵一個有溫度、識得幫你諗計、甚至可以幫你同保險公司「爭取」嘅真人，而唔係一個只會覆你「Sorry, I don’t understand your question」嘅 Chatbot。

好多人新年許願都想財源廣進，買保險時自然會對「平」字產生興趣。但係大家唔好忘記，保險係一份長達十年、廿年甚至一世嘅承諾。所謂羊毛出自羊身上，有啲保險公司可以將成本壓低，無可避免係要犧牲某啲嘢，所以大家買保險嘅時候，就要諗吓「自助式服務」係咪真係適合你嘅長遠需要，定係想聽見一個熟悉嘅人話你知：「放心，交畀我搞，你專心休息」？

新年新氣象，大家喺開工大吉、重新審視自己份保障組合嗰陣，千祈唔好只係考慮「錢」，更要考慮「長遠價值」。喺呢個追求極致速度同數碼化嘅年代，當有一日科技都令你感到無力嘅時候，我哋係咪反而更加需要嗰份買唔到嘅「人情味」同「專業守護」呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。