考車牌可以搵師傅專業又點可以代考？

近日警方聯同保監局採取行動，揭發有人涉嫌以遙距電腦代考方式，協助考生取得美國壽險管理協會（LOMA）嘅「美國壽險管理學會會士」（FLMI）資格。涉案人士以「精讀研習班」、「保證合格」作招徠，收取額外費用提供由報名、考試到作弊安排的「一站式」服務，最終15人被捕，當中包括現職及前任保險中介人。

據了解，不法之徒預先喺考生電腦安裝遙距操控程式，再喺考試當日直接代考。隨住事件曝光，保監局已即時暫停認可FLMI資格作為申領牌照嘅學歷要求，並重新審查所有經涉事中心取得資格嘅個案。

或者，有人會覺得，早啲攞到專業資格，咪可以早啲吸引更多客戶、做多啲生意。但保險呢一行，真正嘅考驗從來唔係考場入面嗰幾十條選擇題。

當客戶問你保障點睇、條款有咩限制、理賠應該點處理，背後冇幕後黑手可以代你回答；當面對家庭保障、退休規劃抑或財富傳承等人生大事，客戶要嘅從來唔係一張專業證書，而係一個真係懂規劃、值得信賴嘅專業人士。

如果連考試都要搵人代答，日後面對客戶，你又點樣幫佢哋做規劃？

業界相信今次涉案嘅人數似乎唔多，整體保險業界嘅專業素質依然穩健，對廣大客戶嘅保障亦唔會有太大影響。

所以希望社會唔會因為小部分「害群之馬」而抹煞一班循正規途徑修讀、憑實力考取資格嘅從業員。佢哋所付出嘅時間與努力，絕對唔應該被極少數人嘅投機取巧所拖累。

保險業嘅專業形象，係一代又一代從業員靠誠信建立返嚟。有人走捷徑，最終唔止自己要付出代價，更係拎整個行業嘅信任成本嚟找數。

拎到車牌，只係證明你曾經通過考核；但真正開車上路，冇人可以永遠坐喺你隔籬。保險業呢條路，真正決定一個人可以行幾遠嘅，從來唔係手上嗰張資格證書，而係背後究竟有冇一份真正屬於自己嘅專業與良知。

保寶達人–為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。