標題黨定真材實料？保險推廣點樣先唔會誤導消費者

你係咪都試過喺社交媒體見到「月供$2,000變身百萬身家！」「保證X%回報，錯過就冇！」呢類標題，心入面諗「有無咁誇張㗎？」最近保監局喺最新一期監管通訊入面，就特別提到呢種「標題黨」式推廣嘅風險，提醒業界唔好為咗吸睛而忽略咗客戶嘅實際需要。

無可否認，唔少人買保險一開口可能會問「內部回報率有幾多？」、「終期紅利點計？」，反映回報確實係好多人揀產品時嘅主要考慮因素。但問題係，當回報成為唯一焦點，風險、流動性，同埋產品係咪真係適合自己，往往可能被忽略咗。

喺競爭咁激烈嘅市場，有部分從業員可能諗住用啲吸睛嘅字眼去吸引客，但係長遠嚟講，真正令客戶信任你嘅，係你肯花時間了解佢哋嘅需要，然後務實地介紹合適嘅產品。推廣內容要平衡，講回報嘅同時一定要講風險、講條款限制，同埋適合邊類客戶。唔好濫用「保證」、「限時」呢類字眼，除非真係有充足時間驗證同資料去支持，否則好容易被視為誤導。

或者有人覺得咁樣係限制推廣，但其實合規唔係束縛，而係幫從業員建立長期信任。客戶信你，先會介紹朋友，甚至願意將更多嘅財富交託俾你規劃。玩社交媒體都要守規，記住大家喺WhatsApp、Facebook、Instagram、小紅書等平台嘅貼文都會受監管，唔好以為用「私人帳號」就唔使為言論負責。相信大家都明白兼認同，誠信係最寶貴嘅資產。

對普羅大眾嚟講，保監局嘅提醒亦都非常重要。見到「保證高回報」要問清楚係保證咩、有咩條件、有咩風險要留意？唔好因為「限時」就衝動決定，真正適合你嘅產品，唔會因為遲一日就買唔到。口頭講嘅回報、保證、優惠，一定要喺產品說明書或者建議書入面睇到。

當市場上少啲嘩眾取寵嘅聲音，多啲務實專業嘅建議，消費者自然會更容易分辨邊個係值得信任嘅夥伴。

最後，大家不妨諗下：作為消費者，點樣先唔會單純畀回報數字影響決定？作為從業員，你又點樣用更真誠、更專業嘅方式，去贏得客戶嘅信任？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。