食壞肚&皮膚過敏有得保

網上保險喺香港剛剛開始流行,但係中國內地其實好早經已賣到成行成市,而且大部分都係經手機平台購買。保寶達人同經常跑內地嘅行家吹水,聽佢哋講過唔少內地市場特有嘅保險產品。

早幾年比較出名嘅有「戀愛險」,投保人指定戀愛對象「3年後不分手且結婚」,可得到理賠禮金或萬朵玫瑰。2014年世界盃期間,又有公司推出投保人支持國家隊出局有錢賠嘅「世界盃遺憾保險」。不過呢兩隻產品概念太過「騎呢」,驚動內地監管出手叫停,令呢類保險「被下架」。

 

由內(臟)保到外(表)

而家市面上仲可以買到嘅,有3至60歲都買得嘅「吃貨無憂險」,保費由10幾人仔至40人仔都有,提供急性腸胃炎門診及住院醫療保障,保額由1,000元至5,000元不等,保障期限3個月至1年都有。大時大節期間食壞個肚睇醫生有得賠,所以每年喺過年期間特別受歡迎。

 

另一隻可以買到嘅「陽光過敏保」,就適合一眾鐘意扮靚嘅姊妹(但無話男人唔買得)。呢隻產品網上買保費只需1蚊人仔,投保人喺1年保障期內,如因化妝品或護理品導致出現皮膚過敏症狀並確診,可一次性獲賠100蚊人仔,每人最多可以買10份。

 

港市場細 無得諗

內地呢類特殊保險,保費多數好平,保費同賠償嘅性價比都算吸引,不過啲行家覺得喺香港係行唔通。因為做生意市場夠大係好重要,好似內地咁多人,就乜都有得做。只要諗到一條好橋,再加埋流動互聯網元素,每個客戶收1蚊,加埋都十幾個億啦!

 

保寶達人為您八盡保險天下事

更多保寶達人手記Click Here