動物園大揭秘

今個星期不如轉吓話題，同大家講一個關於動物園嘅故事。話說城中有間動物園， 3個月前推出咗新嘅入場門票Package，打算吸引更多新遊客入園參觀。但係呢個動物園入便，唔同動物各據一方，各有屬於自己嘅地區，而遊客每次入園，都只能揀一個地區去玩。

一向爭做動物園大佬嘅「雄獅子」同「老虎女」，分別建立咗「紅獅帝國」同「女神國度」，諗住今次肯定吸引到好多新遊客，尤其土生土長嘅「雄獅子」，每次宣傳都落足本，今次為咗搞大佢，特登請咗阿姐級嘅「女王」同組合「肥瘦」做生招牌，諗住憑佢哋喺公仔箱嘅人氣，實可以吸引好多遊客入「紅獅帝國」玩啦。點知事與願違，到而家只係得2萬幾個遊客揀佢哋咋。

咁會唔會因為個廣告令到好多遊客都知道動物園有新Package優惠，反而曲綫益咗其他動物？不過，一向最鐘意同「雄獅子」爭做一哥，擁有英國血統嘅「老虎女」，今次唔知點解都跌晒watt，只係得萬幾個遊客入場，成績只及老對手一半，令人大跌眼鏡。

「兩雄」相爭，咁究竟邊個漁人得利？頭3個月埋單計數，原來大贏家竟然係平時唔多出聲，來自楓葉國嘅「北美豹」，佢個地盤「綠野游蹤」，今次吸引到超過4萬個遊客入場，真係serve都serve唔切，做到無停手。

講返動物園個新Package，係分為VIP級嘅Fast Pass同基本嘅Basic Pass，主要分別係Fast Pass會得到更多優先嘅服務，所以新遊客有7至8成都係買Fast Pass，反映大部分人都唔介意俾多少少入場費，但可以得到更多優質服務。

其實，無論Fast Pass定Basic Pass，靠賣新Package嘅收入係有限，動物園嘅真正目的，係等啲遊客入咗場後，再推銷佢哋買其他產品同紀念品，個啲先係真正搵錢嘅生意嚟！

保寶達人 – 為您八盡保險天下事

更多保寶達人手記Click Here