Mark低923 登記投訴有限期

最近撞到啲資深保險大隊長,成日都會聽到佢哋講「923」呢個冧巴。原來佢哋講緊嘅係保監局正式接手監管保險中介人嘅大日子。

喺舊制度下,規管保險代理嘅香港保險業聯會屬下保險代理登記委員會,將會係8月26號停止處理保險代理新登記及投訴個案,直到9月23號先由保監局接手,即係中間會出現一個廿幾日嘅「停擺」期,等雙方有時間處理交接事宜。

 

學歷僅僅熟要盡快入職

有保險大隊長都幾勞氣,話交接差唔多一個月,好影響佢哋請人,所以已叫back office加快進度處理新入職申請,因為所有於9月23日前獲有效登記嘅保險中介人,將會喺3年內繼續被視為持牌人士,尤其學歷要求方面,如果僅僅符合現有學歷要求即中五程度嘅新人,一定要盡快入職,如果唔係就「蘇州過後無艇搭」㗎喇!

 

另一令業界擔心嘅投訴個案又點算呢?據保監局公布,三間自律規管機構截至當日仍未解決嘅投訴及違規個案,保監局將按照舊有規則處理,即新制度下嘅要求及罰則都唔適用。而且保險代理登記委員會都會喺限期前加快個案處理進度,相信唔會留太多case俾保監局。

 

趁早投訴解大家誤會

有大隊長就講笑咁話,如果代理知道個客想投訴,就應該叫佢趁早去保險代理登記委員會落case,因為凡係過渡期嘅case,保監局都會沿用舊有規則處理,加上新制度上馬,通常判罰都未必去得咁盡,畢竟係試行階段,決定通常會保守啲。

 

當然保寶達人唔係叫行家鼓勵客戶投訴自己,只不過有時投訴其實係因為缺乏溝通同誤會引起,如果及早交俾一個獨立委員會去處理,都可以快啲還大家一個清白。

 

保寶達人為您八盡保險天下事

更多保寶達人手記Click Here