買咗自願醫保移居外地有無得保？

因應近期社會氣氛，唔少中產人士都開始考慮移民外地。有保險界朋友就話，近排多咗客問如果買咗自願醫保，之後打算移民外國，仲係咪用得着？

唔同嘅醫療保險計劃條款各異，有啲的確無地區限制，例如自願醫保嘅保障就係屬於全球性（精神科治療除外）。即使受保人身處外地，不幸遇上意外要喺當地住院，都可提供醫療支援及賠償，有啲Plan甚至可以安排緊急醫療運送返港。

外地出院記得攞齊索償文件

不過，申請索償時要留意，喺外地出院嘅時候，記得向醫生/醫院拎返有關嘅醫療文件，例如醫生填寫嘅索償申請表、醫院發出嘅收據正本、檢驗報告等，資料愈詳細愈好。因為若果文件唔齊，返到香港先向當地嘅醫院申請，可能令索償造成延誤。

雖然自願醫保喺海外用得着，但要注意嘅係，喺香港買嘅醫保，始終以居住喺香港嘅投保人為對象而設計，附設海外醫療保障可以話係一種Bonus。旅遊或短時間旅居外地當然適用，但如果投保人真係打算移民，面對嘅醫療風險同成本就會有所改變，香港嘅保單原先設計未必適用，有部分保險公司根據計劃條款，可能會扣減，甚至取消投保人嘅醫療保障。

移民後保單或變廢紙

考慮移民之前，要了解移居地嘅醫療制度，同審視自己張保單嘅條款，睇吓仲有無需要。以其中一個熱門國家加拿大為例，當地合法繳稅嘅公民可享有免費醫保，即係用公營醫療睇病、住院同做手術都係免費，而且政府更禁止私營醫療，所以持有香港醫保係得物無所用。

所以如果真係決定移民，最好當然係購買當地嘅醫療保險就最穩陣，至於已經買咗嘅香港醫保，投保人應該同保險公司商討係咪需要退保、調整保費或修改保障範圍。