8.30@會展 為保險界發聲!

近排好多保險人都談論緊早排嗰單「四億投連險爆煲事件」,呢單嘢錯綜複雜,或者之後再寫一篇講解吓。但因為呢單負面新聞上晒電視同報紙,令保險業監管議題又再浮上枱面。由於事件涉及龐大金額及多達200名投資者,涉事保險公司同經紀公司嘅相關投訴,相信係會由獨立保監局跟進。

快將全面監管保險業嘅保監局,的確係肩負重任。有保險大隊長話,一個可以在5年間讓從業員人數增加一倍,業績數據每年有雙位數字增長,而且同內地市場有千絲萬縷關係嘅行業,站喺政府嘅角度,當然係要適當控制一下。對於923接手監管中介人有關事宜,保監局一路都係以「唧牙膏」方式,發布不同指引文件作回應,不過到咗距離正式接手只有一個月,都仍然有唔少條例未有定案。

 

新舊交替 小心暗藏陷阱

好多係前綫搵食嘅中介人,比較少留意相關嘅監管新聞,咁就出事!有資深大隊長就話,監管新舊交替其實暗藏好多陷阱,有啲一直以來「可以做」嘅事,923之後可能變成「犯咗法」都唔定,如果中介人到而家仲「懵盛盛」,對監管新例漠不關心的話,第日一旦「中招」就喊都無謂。

 

將來中介人犯咗例,如果涉及刑事,分分鐘要坐監兼罰錢,罰款金額上限仲係一千萬!仲有,第日中介人如果被保監問話,係唔可以用「我無嘢講」、「我要見律師」、「我有權保持緘默」等作回應,而係一定要配合保監調查。

 

學歷要求亦係關注點,中介人入行學歷提升到DSE五科合格已成定局,但過渡前入行,無中五合格學歷嘅從業員3年後續牌,到時要求又會點呢?持有國內學歷嗰班人又點計?呢樣影響好多新移民甚至IANG從業員嘅飯碗,但保監至今未有官方指引,有可能Case by Case處理都唔定。有大隊長就大膽預測,既然學歷認可咁複雜,不如轉移提升中介人考試難度,到時就算有MBA 都無用,要認真咪書過到考試先得。

 

號召參與大會 展現團結一面

保寶達人都希望以上嘅問題可以得到官方解答。嚟緊8月30號灣仔會展就有場「保險業界關注大會」,有業界團體邀請咗保監局代表出席,為即將上馬嘅新監管條例解畫,亦設有問答環節,等當局同業界過吓招啦。

 

保寶達人亦幫手喺度「集氣」,雖然大會話名額只有500個,但有保險大隊長希望號召更多業界逼爆、企滿會場,等保監睇到中介人係幾咁團結。今次活動免費參加,而家仲可以向大會報名,但聽聞就快爆(fact checked)。如果到時有好多人想walk-in,大會或者會考慮流水式操作,等更多從業員可以入場發聲都唔定。

 

香港有成10萬保險中介人,團結就一定可以發揮影響力。記住,「監管關你事,一個不能少」,830會展新翼1樓見!

 

保險業界關注大會

報名網址

 

保寶達人為您八盡保險天下事

更多保寶達人手記Click Here