8月生意如何 保險人的樣子也必如何

行家都知道，內地客係香港保險業重要嘅增長動力。睇返數據，保險業監管局上星期公布咗臨時數字，今年上半年內地客來港買保險嘅新造保單保費按年升17.91%，到263.32億港元，佔個人業務總新造保單保費26.4%。

至於內地投保新造保單總數，就按年跌0.97%至21.37萬張。而單計第二季，新做保單按季跌10.88%，至10.07萬張。上半年整體價升量跌都OK，但問題在於第三季。早排同幾位保險大隊長Happy Hour，講起最近嘅生意，一個二個都喊咁口。  

內地客失蹤 慘過沙士

保險大隊長話6、7月都仲到數，因為好多單係早一兩個月簽落，但係到咗8月，個市完全水盡鵝飛，原本約咗Appointment嘅內地客紛紛Cancel唔落香港，就算見本地客都要避開油尖旺呢啲旺區，搵「安全」嘅地方傾，見完客仲要車埋客戶返屋企。「今個月生意斷崖式咁下跌，仲慘過沙士！」一位大隊長咁樣形容。  

話晒9月至11月係保險業傳統Peak Season。全年到唔到數？去唔去到Convention？有幾多年終獎金？就係睇呢幾個月。問題係，數據已顯示，內地客生意量已開始從高峰回落，大家都知內地客買香港保險，一定要親身來香港簽單，因應最近社會動盪，內地人短時間都唔會有心情落嚟，就算「傾好」都唔簽得住，所以好多主力靠內地單食糊嘅大隊長，都唔想面對「8月交到幾多數俾公司」呢個殘酷現實。  

IANG管理 問題多多

當然，少咗自由行，令到IANG嘅生意短時間內大受影響，但IANG喺保險行業佔一席位，好多公司都十分支持佢哋嘅發展。之不過對IANG嘅管理亦有唔少挑戰，講緊嘅唔單止近期因社會環境令生意插水，仲包括一啲管理培訓同踩界銷售嘅問題，等下次再同大家分享。  

保寶達人 – 為您八盡保險天下事

更多保寶達人手記Click Here