點解保險牌咁值錢？
經過本欄多次提醒，而家大部分行家都知道保險中介人嘅發牌制度，經已由保監局全權負責。經歷咗監管嘅轉變之後，有保險大隊長就話，將來保險牌會愈嚟愈值錢，一定要好好珍惜。
門檻提高 申請時間長
諗真啲，其實佢咁講唔係無道理。第一，政府想加快推動行業邁向專業化，所以提升咗保險中介人嘅入行門檻，由原本中學畢業就得，提升到要DSE五科合格，包括中或英，及數學。即係話而家會考中英數唔合格嘅人，除非有其他認可學歷資格代替，否則連考牌嘅基本資格都無。
第二，如果唔係聽啲大隊長呻保監局審批發牌申請效率慢，保寶達人都唔知，原來而家連符合晒要求嘅新人，申請掛牌都可能要等成幾個月。相信係因為保監啱啱先交接完，新系統需要時間熟習，加上申請多人手又唔夠，所以先搞到慢咗啲。
一牌難求 小心勿被DQ
希望運作上軌道之後，保監可以批得快返啲，話晒好多新人，逐張考晒啲Paper一般都要幾個月，加埋等掛牌嘅時間，可能要搞成半年先可以正式Sell單，仲有一批轉公司嘅行家等緊個牌繼續做生意，真係要有兩手準備先得。 總之而家一牌難求，加上市場環境轉差，有牌嘅中介人千祈唔好因一時貪念或疏忽犯錯，搞到個牌被DQ呀！
