學歷未夠班趕尾班車 「甩轆」被DQ點算好？
上次講保險牌點解咁值錢，讀者反應好熱烈，想達人再分享吓有關牌照嘅事，點知又真係咁啱有事發生喎。
相信大家都知8月係舊制度保險中介人登記「尾班車」嘅最後截止時間，各保險公司真係入咗數以千計嘅新代理登記申請。
話說某保險公司有個趕尾班車嘅新代理，喺8月23號前向保險代理登記委員會遞交申請，9月23號後過渡至保監局審批，好衰唔衰身份證號碼寫錯咗一個冧巴，搞到個申請彈返轉頭；修改後再交，點知俾保監局當成新申請，而呢位仁兄由於唔符合新嘅學歷要求，而被「DQ」入唔到閘。
一粒字之差 後悔莫及
「人類總是重複同樣的錯誤」，據保寶達人所知，保險公司內部嘅申請表格，寫錯資料、簽錯或唔記得簽名呢啲情況係家常便飯。但有時呢啲一時疏忽，後果原來可以好嚴重。
講真，趕得尾班車嗰啲申請，有唔少都係因為想避開新學歷要求，相信類似嘅「甩轆」case唔止一兩件，不過呢單嘢由於涉及制度交接，可能仲有上訴空間，希望呢位仁兄最後成功入到閘啦！
如有困難 須盡早提出
如果真係被DQ咁點算好？據保寶達人所知，今次香港人壽保險從業員協會（保協）都好關注呢件事，主動向業界彙集相關嘅資料，再向保監局進一步反映同跟進，希望可以支援到當時提出代理登記申請嘅新入職同業，順利以舊制度入職。
所以保寶達人喺度呼籲，如果你喺8月23號或之前曾向保險代理登記委員會提交新代理申請，因個人及/或程序問題，到而家都仍未獲批或者申請被拒嘅人士，可以喺11月18日（星期一）或之前到https://forms.gle/LLdysbLq4Q7ApzSaA 填寫相關資料，等「保協」可以幫手反映。
保寶達人 – 為您八盡保險天下事
更多保寶達人手記Click Here
