申請中介人牌照填錯資料有幾大鑊？

上星期同一班保險大隊長Happy Hour，大家又不約而同講起保監局批核中介人牌照申請嘅進度，有嚟自某大公司嘅大隊長話佢公司入咗300個申請，交接後一個月只批出1個，另一間大公司嘅大隊長都話入咗200幾個申請，等咗個半月只批到12個。

上星期同一班保險大隊長Happy Hour，大家又不約而同講起保監局批核中介人牌照申請嘅進度，有嚟自某大公司嘅大隊長話佢公司入咗300個申請，交接後一個月只批出1個，另一間大公司嘅大隊長都話入咗200幾個申請，等咗個半月只批到12個。

申請期太耐 恐影響新人入行

正常嘅講，如果無填錯資料或文件唔齊等問題，每個申請平均14日左右就可以批到，好明顯而家進度係遠遠落後。不過保寶達人都想幫保監局講兩句，始終太多人喺8月底前趕搭尾班車，一下子多咗幾百個申請，加上有好多資料同系統要交接，批核需時比平常耐都係人之常情。其實保險行業團體應該同保監局溝通，商討一下因應現時情況，合理嘅批核時間應該係幾長，起碼令大家對咩為之「好耐」有共識，因為唔同人對「好耐」都可能有唔同嘅定義。

有保險大隊長就呻，咁辛苦搵到個有潛質嘅新人，如果以後考試連掛牌要等成幾個月甚至半年，會令佢哋更難請到全心全意想喺行業發展嘅人才。不過，保寶達人相信批核得慢嘅情況，只會持續一段短時期，當上咗軌道之後應該有明顯改善。

「甩轆」個案 原因層出不窮

講起8月23號上車嗰批尾班車「乘客」，上次提過保協主動收集當中「甩轆」嘅個案。截至11月19號收到27宗申訴個案，其中有8宗喺遞交申請後被通知要補交文件，但一係補交後無回音，一係就補交後被拒絕申請；亦有嚟自個別保險公司嘅5宗個案，都係收到通知話申請資料有錯誤或漏填，但不獲補交或更正機會。仲有7宗就係交齊資料後，一直未收到任何回覆。

另外有7宗個案「甩轆」情況較為嚴重，申請人收到通知話填寫資料錯誤/漏填，但係因為過咗舊制申請日期，唔能夠以舊制要求申請牌照；最搞笑係原來所謂填錯資料，竟然有個案係串錯自己個英文名或寫錯身份證號碼。唉，就係因為呢啲唔小心導致嘅問題，而家搞到可能連份工都無埋呀陰公！

好彩嘅係有「保協」透過「壽險行業規管與發展關注組」幫佢哋向保監局爭取，或者仲有轉機。雖然保寶達人都想佢哋今次過到關，但呢班人連自己個人資料都填錯，就算僥倖過到骨，唔該都要好好反省吓。佢哋想做保險幫客戶做好保障，一定要用心對每件事，即使係細小嘅嘢，咁先可以俾到客戶信心呀！

保寶達人 – 為您八盡保險天下事

更多保寶達人手記Click Here