拆解新入行學歷　數學「急救」班有得諗？

9月23號起，向保監局登記為保險中介人，需要達到新入行學歷要求，即係DSE五科合格或同等學歷。講真要求唔算好高，因為而家好多新人最起碼都大學畢業，但係通常「魔鬼在細節」。睇真啲，五科合格當中一定要包括數學，而有唔少保險大隊長對數學呢Part都有所保留。

保單條款涉及財務計算，需要數學知識係好合理，問題係DSE嘅數學有幾多真正可以用喺保險實際工作度先？諗真啲，其實只佔好少部分。

可考慮認可「財務數學」

至於另一個疑問，就係如果當年真係數學科失咗手，又或持有非本地學歷嘅人士，要「補救」唔通只得補考一年一次嘅DSE一途？有大隊長就建議保監局考慮認可一啲幾個月至半年就可以完成嘅「財務數學」（Financial Maths）專門課程，俾一啲有志入行但未能符合數學學歷要求嘅人，「補習」金融財務相關數學知識。

計我話，呢個建議先係真正對症下藥，令知識學以致用，而且呢類課程肯定有市場，因為除咗想入行嘅人士可以讀嚟「急救」數學之外，亦適合一啲想溫故知新，學返啲實用財務數學知識傍身嘅現職保險中介人，如果課程能夠獲得保監局認證，仲可以為將來續牌做定準備。對保險業團體同進修院校嚟講，真係有得諗喎！

保寶達人 – 為您八盡保險天下事

更多保寶達人手記Click Here