武漢肺炎與旅遊保險Q&A

上星期世衛將「武漢不明肺炎」正式命名為「2019新型冠狀病毒」，仲話佢能夠「有限度人傳人」，呼籲防疫部門要為大規模擴散做準備，於是唔少打算新年出遊嘅親友，個個變成「緊張大師」，除咗搶購口罩之外，仲成日問保寶達人究竟旅遊保險保唔保呢類傳染病？好喇，今次就一次過答晒相關疑問！

Q：武漢出現「2019新型冠狀病毒」，旅遊保險保唔保？

A：現階段都仲保，因為當局未有公布為疫區或疫埠，香港政府亦無發出外遊警示。不過旅遊保選擇眾多，投保前要先了解保單內容同條款，特別係傳染病定義同有關受保事項等，以免之後有爭議。

Q：一早安排咗去武漢公幹/旅遊，而家想取消行程，旅遊保險賠唔賠？

A：部分旅遊保險有列明提供相關保障，如果受保人喺出發前7日內，目的地突然爆發廣泛性傳染病，理論上可獲「取消/縮短旅程」賠償，保額可達幾萬蚊不等。不過每間保險公司對「傳染病」嘅定義都唔同，如果想知實際有無得賠，最好向保險公司查詢。

Q：旅行/公幹期間感染「肺炎」等傳染病，應該點算好？

A：大部分旅遊保都提供海外住院、門診、住院現金及手術保障。喺未確定為疫區/疫埠前，Touchwood外遊期間真係「中招」，由於肺炎具極高傳染性，喺當地醫院求醫多數會安排入住隔離病房。總之無論咩病都好，出院要保留所有醫療報告、證明文件及收據等，返香港後向保險公司索償。

另外，受保人亦應致電保險公司緊急支援熱綫，如果保險公司經評估後覺得適宜將受保人送返香港治療，可安排醫療運送，部分旅遊保會支付相關開支。有啲旅遊保仲有針對傳染病嘅特別條款，即使無海外求診紀錄，只要返港後7日內被確診，一樣有得賠。

Q：唔返內地係咪就安全，唔使買旅遊保都得？

A：去旅行買定保險係指定動作。如果為慳幾百蚊唔買，一旦出事到時一定後悔。而且內地正值「春運」，人口流動性非常高，而家唔單只武漢及內地城市，連海外都出現確診個案。所以無論去邊度旅行，買機票後最好即刻買埋旅遊保，所謂早買早享受，切忌臨急抱佛腳。因為如果出咗疫區公告或外遊警示後先買，保險公司就有權不作賠償。

保寶達人 – 為您八盡保險天下事

更多保寶達人手記Click Here