保險大隊長憶沙士經驗 論業界如何應對武漢肺炎

過年前同幾位保險大隊長Happy Hour,由於在座嘅閒閒哋都入行廿年以上,經歷過2003年沙士事件,所以大家一講起今次武漢肺炎爆發,都覺得業界應該借鏡當年沙士嘅經驗,睇吓可唔可以轉危為機。

2003年年中,當時成個香港都籠罩喺沙士陰霾之下,病毒喺社區爆發之後,大部分人出街都戴晒口罩,盡量唔去人多嘅地方,令到零售生意史無前例咁差,唔單止吉舖連連,住宅樓價亦受牽連,尤其「中招」屋苑更跌到「把把聲」,但係都無人敢接。

 

逆境變招 生意不跌反升

 

對於搵生意主要靠見客嘅保險Sales,見唔到客即係無生意,咁就惟有變招啦。大隊長A除咗積極打電話俾客傾單外,仲會約埋客一齊行山,因為當年好多人放假都唔再去商場戲院,反而去郊野公園行山呼吸新鮮空氣。至於最重要嘅簽單,由於無論如何都要見面簽名,惟有各施各法,有大隊長話試過喺地鐵站簽,又或者去客戶屋企樓下簽都有。

 

雖然當時一片愁雲慘霧,但估唔到嘅係2003年保險業埋單成績不跌反升,整體毛保費總額(一般保險業務同長期保險業務合計)較2002年增長14.6%,相信係因為沙士危機反而令港人整體保險意識加強咗。大隊長A就話,沙士過後好多人都覺得醫療相關保險例如住院、危疾等應該愈早買愈好,令從業員多咗機會吸納新客戶。

 

大隊長B就補充,當年仲有一類產品都賣多咗,正因為當時啲客戶對經濟走勢、投資前景嘅睇法都比較悲觀,唔少保險公司就變陣,力谷俗稱「2Pay5」短期儲蓄保險,穩陣得來又有少少息收。

 

人壽保險 保障最重要的人

 

至於大隊長C就提到謝醫生,佢除咗因救人而殉職嘅英勇事迹外,唔知大家仲記唔記得當佢兩夫婦過身後,兩家人曾經因為遺產而要對薄公堂,當年呢件事令大隊長C覺得人壽保險係一種更適合用嚟安排遺產嘅方法,因為投保人可以指定受益人,如果落埋「不可撤換受益人」條款,為心目中最重要嘅人提供毫無保留嘅保障,就更加令人感動添!

 

保寶達人為您八盡保險天下事

更多保寶達人手記Click Here