抗疫啟示錄 保險界把握3大機遇

新型肺炎疫情搞到各行各業嗌晒救命，不過好多入行2、30年嘅資深大隊長，都認為疫情反而會增強大眾對保險嘅意識，只要用正面嘅角度去睇，今次疫情仲為業界人士帶嚟唔少啟示。

有專做內地客大單嘅團隊，近呢半年真係無啖好食，由於內地人要簽單就要落香港，而上年下半年好多客「唔敢嚟」，到而家就「唔俾嚟」，你話生意又點會好呢？不過又唔係全部行家都係咁，保寶達人就聽聞，行內有啲中小型團隊年初至今生意無跌，仲有微升，因為多咗本地客加碼投保，相信對一啲做開內地客嘅大隊長係一個啟示。

為疫情後做好準備

其實本地客生意一直佔行業生意額6成以上，係推動行業發展嘅中流砥柱。有資深保險大隊長就話，近排團隊雖然主要係「在家工作」，但佢每日都會叫同事花幾個鐘頭打電話關心客戶，其間完全無提及產品，純粹關心同傾吓偈，有時傾吓抗疫情況都大半個鐘，令客戶感受到agent無論有無生意都會關心自己，咁疫情過後搵佢傾新單都易啲啦。

另一個啟示係即使喺艱難嘅日子，保險都依然繼續請人，特別係agent。經濟不景令就業市場多咗嚟自唔同行業嘅有經驗人才打算轉行，呢班人有行業人脈，待人處事又夠成熟，相信好多團隊都爭住請。的確，幾間大保險公司近年都積極壯大團隊，有大隊長仲話請人緊要過開單，因為請唔夠公司要求嘅人數，唔單止無得升職，仲可能要降級添！

疫症令業界更團結

至於第三個啟示，就係大家都知保險向來係一個市場競爭幾大嘅行業，公司同公司之間鬥業績鬥人多，監管機構同業界之間就監管事宜討價還價咁。但今次面對疫情，整個行業就十分團結，一來監管機構同業界溝通多咗，仲共同協商推出「遙距簽單」等紓緩措施，二來唔少保險公司都互相響應推出客戶關懷措施，例如客戶「中招」有額外保障；亦有行業團體如「保協」成立抗疫基金支援有需要嘅同業，與業界共渡時艱。

保寶達人好有信心，當雨過天青後，市場累積嘅保險購買需求肯定比之前更大；行業吸納到嘅新一批人才，意志會更加堅毅；最重要係保險界經此一「疫」後更加團結，一定可以令保險業再起飛！

保寶達人 – 為您八盡保險天下事

更多保寶達人手記Click Here