保險業界同心抗疫 表達訴求認住正牌協會

雖然疫情影響保險業生意，但保寶達人喺呢段日子，見到唔同崗位嘅保險業人士都同心抗疫，反而覺得疫情令業界更加團結。好似保險公司推出延長保費寬限期、額外新冠肺炎保障等措施；監管機構就容許暫時以遙距銷售方式簽單；而一眾保險業界協會亦團結一致，好似香港人壽保險從業員協會（「保協」）早前就聯同其他行業協會，向保險界立法會議員陳健波提出意見，而波哥聽取保協部分意見後為業界發聲，向政府建議支援保險代理及經紀，令保險業成為受惠於政府剛公布第二輪防疫抗疫基金措施嘅一份子。

多項措施解燃眉之急

簡單歸納一下，首先政府優化「中小企融資擔保計劃」下8成、9成同百分百特別擔保產品，可以減輕保險業中小企包括保險公司、保險經紀公司同保險代理機構嘅資金壓力。第二樣就大家都知，政府會為有供強積金嘅僱主支付每名員工50%月薪，每月上限$9,000，為期6個月，呢樣保險團隊入面嘅後勤職員就可以受惠。至於第三樣最直接，由於保險代理大多屬自僱人士，政府會為上年有供強積金嘅自僱人士提供$7,500嘅一次性資助，都叫可以幫補下。

「保協」而家仲繼續收集緊業界人士其他意見同訴求，如果業界人士想提出意見，可以去https://qrgo.page.link/smRuR表達。

填問卷宜小心處理個人資料

講開提出訴求，其實而家任何人都可以整張Google Form做問卷調查同收集資料，但攞到嘅資料特別係個人資料，之後會要嚟做乜真係無人知。所以保險大隊長就提醒行家，如果收到不知名或未聽過嘅機構話做問卷調查或要求提供資料，就一定要加倍小心，要了解吓個機構嘅背景，特別近期有唔少話自己代表保險從業員嘅新機構成立，有啲甚至連名都未定實。總之，一定要認住係攞正牌兼喺業界有地位嘅行業協會，先好提供意見同資料呀！

保寶達人 – 為您八盡保險天下事

更多保寶達人手記Click Here