疫情爆第三波保險「自顧人士」點自救？

保險Agent好聽就叫「自僱人士」，其實應該係「自顧人士」至真。唔少Agent都係冇底薪，主要收入靠佣金，冇單開就冇飯開。7月初原本以為終於捱過疫境，特別係靠內地客生意嘅行家，諗住可以重新迎接內地客啦！點知第三波疫情爆發，情況仲嚴重過之前。不過，保險人出名轉數快，究竟佢哋有咩方法自救呢？

有一定行業資歷同客戶基礎嘅行家，都仲可以靠續保佣金，或者專做本地客嘅危疾醫療、短期儲蓄呢類單，有啲保險公司仲提供埋「虛擬見客」銷售平台，方便Agent傾單同簽單。而且保險公司見疫情影響環境咁大，都唔想俾人感覺太冇人情味，所以聽聞對一啲入行無耐嘅新人，對數嘅要求係鬆手咗，達到基本要求就夠，甚至之前提過，有啲保險公司仲向Agent提供貸款，因為總好過佢哋出去借「財仔」吖。

拓「新香港人」客戶

至於受今次疫情衝擊最大嗰班，肯定係專做內地客生意嘅IANG團隊，如果識得「好天斬埋落雨柴」，靠之前賺落嘅，應該都可以頂一陣，不過長遠咁落去都唔係辦法，但可以點「絕地求生」呢？聽講一啲大型保險公司內部，開始推動緊一種轉型文化，有一啲以往做內地生意非常出色嘅Agent，拍片講自己點樣「轉型」，專門拓展一班長駐香港嘅「新香港人」客戶。

香港真係有唔少內地人嚟定居，佢哋可能係嚟香港讀完碩士繼續做嘢，之後結埋婚生埋小朋友，成家人拎探親簽證喺香港度住；又或者經優才計劃來港，唔少係香港上市嘅內地公司員工或專業人士。有留意開地產市場嘅都知，西九龍一帶嘅豪宅，又或者近科大嘅將軍澳，好多居民都係講普通話嘅，可想而知呢個市場係有得做。

轉攻本地人生意

另外仲有一啲保險團隊，就好似其他行業例如酒店咁樣，轉攻香港人本地生意。保寶達人喺之前疫情受控嘅時候，都覺得條街多咗唔少RoadShow，甚至有保險公司趁商舖租金平，喺一啲人流都唔錯嘅民生區，以短租形式開地舖，主推短期儲蓄保險同醫療保險類產品，轉攻家庭主婦市場。

諗深一層，今次疫情令唔少保險團隊上咗一堂課，反思以往太着重單一市場嘅缺點，所以比較健康嘅策略係有最少2至3大類客戶群，咁樣平均發展長遠先至穩陣。