4.75億騙案的反思 做個重操守有誠信保險人

呢幾日「4.75億元投資相連保險平台基金騙案」轟動成個保險業界,唔少大隊長都私信保寶達人講呢單嘢,因為2019年內地網站經已傳出呢單疑似騙案嘅消息,由於涉及某國際知名保險公司,當時已經有大隊長預言呢單嘢遲早爆到嚟香港。

根據警方資料,今次涉及呢宗案件嘅保險業人士,其實係保險經紀,身份係獨立中介人,唔係為保險公司工作,同保險代理性質唔同。但保寶達人覺得,只要係保險從業員,其實都坐埋同一條船,如果因為少部分害群之馬嘅不法行為,影響晒成個行業嘅形象,就係成個業界都唔希望見到嘅事。

 

雖然都係老生常談,但再一次提醒大家,作為保險從業員,無論係經紀抑或代理,或者任何一個崗位,專業誠信同道德操守永遠都係No.1。當然明知做法違反法律或法規,就必定要Say No,千祈唔好有「博一博」心態,因為近年監管嚴格咗好多,不當手法難逃法網。

 

誠信操守最重要 沒有之一

 

保險經紀會賣唔同保險公司嘅產品,如果有來歷不明嘅產品或基金,啲條款連自己都攪唔清楚,就算佣金幾高,都一定要好小心,可以諗辦法查證一下,如果都仲有疑問,就索性唔好賣。因為如果日後呢間公司、呢隻產品或相連嘅基金出事,經紀都好難獨善其身,咁做其實都係保護緊自己同客戶嘅利益。

 

至於保險代理,都要時刻將客戶嘅利益放係第一位,呢點亦係保險事業嘅長遠發展之道。就算唔係講緊違法行為,其實大家每一日都面對緊好多挑戰同試探。好多人都知保險產品佣金有高有低,面對高佣金嘅引誘,如果只為自己利益著想,夾硬推介唔適合嘅產品畀客戶,客戶好快亦都有所察覺,呢種「殺雞取卵」式嘅生意,一定唔會長久。而且好多人搵保險顧問都係搵相熟朋友介紹,正常人點會推介一個無誠信同自私自利嘅顧問呢,除非同呢個朋友有仇啦!

 

最後,呢單新聞仲提醒廣大市民一個重要訊息,就係投保投資相連保險產品之前,一定要先了解當中嘅風險。呢類保險一般保障成分唔高,以投資為主,回報同所揀嘅基金表現掛勾,會有可能大幅波動甚至虧損。所以投保人都要自己做定功課,喺投保前清楚自己究竟想投資乜嘢基金呀!

 

保寶達人 – 為您八盡保險天下事

更多保寶達人手記Click Here