兩地掛牌疫下翻生 澳門射單過香港？

疫情持續咗年半，而家再講內地客生意有幾慘淡，經已係Old News，反而大家應該睇吓IANG同主力做內地生意嘅團隊，除咗轉攻本地客同新香港人之外，仲有無咩板斧可以起死回生呢？

最近成日講大灣區大灣區，於是有唔少行家就問，究竟香港Agent可唔可以上內地掛牌做生意呢？答案其實係可以嘅。而且香港Agent上內地掛牌並唔係咩新鮮事，有資深大隊長就話當年，喺大約十幾年前，有間保險公司專登搵一班香港Agent上廣州考牌，提供內地保險產品培訓，之後就喺內地間聯營公司掛牌，主力做內地客生意。不過，呢條橋當年發覺唔係好Work，因為兩地產品佣金有差異，報稅制度亦有好大分別，所以都唔使十年，9成9以上Agent就已經將個牌退返畀廣州分公司。

點知兩地掛牌呢條舊橋，估唔到竟然係疫情下翻生。不過以下純粹分享路邊社消息，一切未經證實，唔好太過認真。

疫情發展到而家，澳門防疫可以話做得唔錯，通關防疫要求亦係比較寬鬆，而家內地入境澳門嘅人士，係毋須接受隔離嘅，變相即係通咗關啦，於是澳門對保險公司嚟講，突然間變得好有戰略性價值。

疫情令香港通關只能期待，於是有消息人士就話，香港保險公司為咗幫主力內地生意嘅團隊搵出路，睇準內地居民去澳門唔使隔離，就安排幾個有澳門身份證嘅香港同事，派佢哋去澳門考保險牌，再喺澳門嘅分公司掛牌，長駐喺澳門賣保險，但係賣嘅產品同香港方面一模一樣，連佣金制度都係。

所謂肥水不留別人田，如果內地居民想買香港保險，就可以去澳門簽單。當內地客戶去到珠海嗰邊，會由澳門居民持牌人帶上澳門分公司寫字樓，而澳門分公司就負責提供接待同簽單嘅Office地方，至於張單最後就入香港條Team嘅數咁話，連香港嘅經理都有Override。

再提一次，呢單只係小道消息，至於係咪真係有行家咁樣「射單」法，就信不信由你喇！

保寶達人 – 為您八盡保險天下事

更多保寶達人手記Click Here