保監局開聲表示關注 保險「街霸」究竟衰乜嘢？

唔知大家有無發現，呢兩年疫情變成日常後，經常會喺街度見到有保險公司代理人喺街頭擺放臨時攤位招客，即係俗稱「街霸」，或者租用街邊空置細舖銷售保險產品。

不過，保監局之前喺《監管通訊》度就表示，接到多宗有關呢啲「街霸」或街舖嘅投訴同意見，指部分保險代理人使用未經保險公司批准嘅宣傳品，引誘客戶接受推銷，甚至強迫客戶購買唔需要嘅產品咁話。仲講明以免費派口罩同扮做問卷調查，引起客戶注意，呢類行為絕對唔應該。

其實今次其中一個關鍵係啲宣傳品，因為有啲保險產品其實都幾複雜，唔係咁簡單貼幾個冧把出嚟就得。但掉返轉諗，條街度人來人往，要吸引市民停低腳步，唔用比較吸引嘅數字的確係有難度嘅，不過大家都知「邊有咁大隻蛤乸隨街跳」，嗰啲細字條款先係重點。所以，就算想吸引客戶，標準答案都係要用由委任保險公司提供或獲其認可嘅銷售材料，至於自製宣傳品就盡量可免則免。

另外，喺呢度再提一提大家標準銷售流程係點。根據《持牌保險代理人操守守則》，保險代理人要向客戶提供充足資料，協助對方作出知情嘅決定，並向客戶提供有關各保險產品嘅主要特點所有相關資料，例如保單條款及細則、不保項目、保費水平、費用同收費等。而最重要嘅係，如果客戶話需要考慮，就一定唔好強迫，要畀客戶更多時間考慮，例如另外再約時間傾。

所以話，「街霸」本身係無問題，保監局都認同喺街度做短期推廣或臨時攤位，可以畀更多公眾接觸到保險中介人同產品，但係呢啲街頭推廣如果無好好去管理，或者代理人無遵守有關守則，就可能會令市場行為風險增加，到時保監真係唔止「出聲」，「出手」叫停就大家都唔想啦！

所以各位下次要擺街站，識點做啦！

保寶達人 – 為您八盡保險天下事

更多保寶達人手記Click Here