大灣區跨境保險服務中心快落地 香港保險公司有冇份參與？

最近財經界嘅熱話，一定係中港兩地期待已久嘅「跨境理財通」終於開通！不過好可惜第一階段主要係銀行嘅中低風險理財產品，至於「跨境保險通」就一直只聞樓梯響。

上年施政報告落實成立粵港澳大灣區售後保險服務中心，原本話係專為喺內地工作或生活嘅港人服務，後來擴展至持有香港保單嘅內地居民服務，仲由單純諮詢擴展到理賠服務。

而家內地居民來港購買保險，一定要親自來港辦理手續同簽單，但係疫情令兩地往來幾乎中斷，唔好話簽單啦，而家連想續保交保費都有困難。以前未有疫情，Agent可以陪個內地訪客行吓海港城，買吓包包，順便上埋保險公司Office簽單或者交保費，但今時今日行唔通點算好？所以業界就期望借大灣區跨境保險服務中心，用好似「跨境理財通」咁嘅封閉式管道邀交保費咁話，但係有大隊長就表示唔睇好，因為之前內地訪客來港買保險種類太多，相信唔係乜嘢保單都可以咁樣交保費。

不過大灣區跨境保險服務中心已經開咗綠燈，仲話選址有可能唔止前海，仲有其他城市咁話，於是好多行家腦海即時浮現美好嘅想像，覺得將來Sell內地客戶會更加方便。之不過大家有冇諗過服務中心實際營運係點呢？

要知道最多內地客戶嘅香港保險公司，其實來來去去得嗰幾間，唔通由佢哋負責營運？有大隊長就話暫時收到最新消息，係話營運呢個服務中心嘅，唔會係香港嘅保險公司，而係當地嘅代辦機構，到時會有唔同嘅會客室，一人一間房咁話，既然本港保險公司都冇份玩，咁個服務中心可以做乜呢？

不過成立服務中心都唔係一啲著數都冇嘅，起碼有象徵性意義。如果有睇開內地微博同公眾號，可能間唔中都會見到內地有網民話去香港投保係非法，話香港嘅法律係中國內地唔承認，所以買咗香港保險嘅中國居民係不受保障云云。如果今次得到官方認證嘅大灣區跨境保險服務中心真係成功落地，呢啲網上謠言就會不攻自破，對香港保險產品嘅正面形象都有少少好處。

保寶達人 – 為您八盡保險天下事

更多保寶達人手記Click Here