「Deemed Licensee」續牌之亂 明年9月22日將會血流成河？

話咁快2021年就快到尾聲，最近同保險大隊長傾開計，佢哋話而家好多時見到面都會問對方──你續咗牌未呀？講緊嘅係保監局要求全港持保險中介人牌照嘅人士重新提交資料做續牌審批，但係過程中就有一啲問題引起業界人士關注。

先講少少背景，保監局喺2019年9月23日接手保險中介人監管同登記嘅工作，喺呢日前已登記嘅持牌人，會自動獲發三年牌照，叫做已持牌人士（Deemed Licensee）。如果佢哋想喺2022年9月22日之後繼續有得撈，就需要向保監局申領新嘅牌照。

有資深大隊長就咁講，前年保險業聯會同保監局交接嘅時候，理論上所有中介人登記嘅資料都會一併過畀埋保監，但係保監就覺得啲資料唔夠完整，想重新建立一套屬於自己嘅資料庫，所以就要求全港持牌人分批用「保險中介一站通」電子服務站做中央登記。

講到呢度好似好合理咁，但到實際操作，問題就出現喇。有大隊長就反映，有唔少Agent「撠」係學歷認證嗰度，搞極都搞唔掂，甚至江湖傳聞有保險公司趁呢機用呢個理由去炒人，而「受害者」主要係持有非本地學歷例如內地或海外，喺提供學歷證明方面遇到困難嘅人士。

學歷證明關卡出現阻滯

有大隊長就分享一個Case，呢位仁兄喺2000年左右入行做Agent，當年係用中學畢業證書註冊，做咗十年左右無做去咗進修，讀完個大學Degree之後再做返，到最近搞Deemed Licensee續牌嘅時候，系統要求佢上載當時登記嗰張中學畢業證書，但係張證書喺多次搬屋後經已搵唔返，最慘係佢想補領都唔得，因為間中學已經唔喺度，於是就企咗喺度唔知點算。

雖然呢位仁兄已經持有大學畢業證書，已經可以滿足晒最新嘅中介人登記要求，但係由於佢唔係新登記，而保監局規定Deemed Licensee續牌一定要交返第一張證書，其他都唔計。咁而家佢唯有將情況反映畀保監局，睇吓之後會有乜安排。

保監局一早經已講到明，續牌嘅最後限期係2022年9月22日，有大隊長就形容呢日將會係血流成河嘅日子，有唔少Agent將會過唔到關，對行業士氣會有打擊。咁又係，既然都唔知自己過唔過到關，但而家仲做緊生意，唔通同客講下年自己有可能續唔到牌咩，邊個仲會同你買單，一係有啲人已經喺度開始諗緊後路轉行。

不過，有行家就似層層咁話保監局可能會有「特赦」。保寶達人就覺得機會好微喇，因為保監局係跟《保險業條例》做嘢，法例上寫明三年過渡期後要續牌，如果因為個人原因而交唔到資料，保監唔批係絕對符合法例。雖然「特赦」唔太可能，但係會唔會有啲寬限措施，好似CPD嗰次咁延長寬限期，畀大家爭取多啲時間搵資料，或者話唔定會有。

總之，未雨綢繆就一定無錯，所以就算仲未收到通知要續牌，奉勸各位行家有時間都最好搵定當年嘅登記資料出嚟，以防萬一！

保寶達人 – 為您八盡保險天下事

更多保寶達人手記Click Here