純網上壽險威脅保險代理？

今次疫情大大推動網購發展，市民喺網上買嘢慢慢成為習慣，相信網上壽險都有受惠，多間純網上保險公司都表示疫情下業務增長唔錯。唔通純網上壽險嘅發展，真係好快會對傳統保險銷售渠道，特別係保險Agent造成威脅？

答案係暫時唔會，監管機構現階段對網上壽險公司嘅限制好大，只係得醫保VHIS、定期壽險、短期儲蓄呢幾類結構較為簡單嘅產品賣得，所以短時間都好難見到網上保險成行成市。

皆因純網上壽險剛起步，所有人包括監管機構都觀察緊「先頭部隊」嘅表現，除咗銷售手法要合規外，理賠等售後服務都好重要。而家喺網上投保，啲條款撳個掣就accept晒，其實係skip咗好多傳統公司嘅財務需要分析（FNA）手續，但係有幾多網上客戶真係睇明白晒？所以對呢啲公司嚟講，投保之後嘅售後服務先係考驗，但呢啲係要再多幾年先睇到高低。

雖然監管機構對網上壽險發展有所限制，感覺上好似傾向照顧緊傳統保險公司，但監管機構其實係以顧客為先，當顧客需求轉變，監管機構自然都會做嘢，所以大家唔可以否定網上投保嘅存在價值，始終數碼化係大勢所趨，如果以長遠十幾廿年計，慢慢舊人換新人，當習慣實體投保嗰班客退落嚟，到年輕人長大成為未來主力客群，佢哋由細到大都習慣網絡世界，一定有唔少人會buy網上投保。所以肯定嘅係未來監管機構會循序漸進咁開放市場，第日網上壽險可以賣嘅產品會愈來愈多。

數碼化大勢所趨  保險代理當自強

而且大家唔好忘記，今次疫情帶出咗一個好重要既啟示──原來真係唔需要「實體」見面都可以簽到單，用視像平台一樣可以。某程度上話畀行業同監管機構知，科技發展有可能令兩者結合，網上同實體之間其實有可行嘅方式，既可以提供到Agent專業建議，又令投保更加方便。所以而家一直延長嘅遙距簽單臨時便利措施，未來變咗恒常措施都話唔定。

保寶達人就覺得保險始終係人生大事，有專人解釋條款會更加放心，而且當年輕人從單純投保升級到財富規劃，到時一部手機未必能夠滿足到，慢慢佢哋都需要返專人諮詢，之不過Agent就需要自強，特別係加強理財策劃，如果只係賣到壽險同醫保，將來仲係咪搵到食都好難講。

講開又講，雖然話疫情有利網上壽險，但大家有無留意近年街上便突然多咗好多保險公司開嘅舖頭，相信係疫情下商舖租金下跌，吸引佢哋趁機進駐拓展業務。由易拉架Roadshow升級到舖頭分行，咁疫情某程度上係咪都推動咗實體銷售呢？

保寶達人 – 為您八盡保險天下事

更多保寶達人手記Click Here