「Deemed Licensee」續牌用更高學歷真係唔得？

估唔到上次喺專欄出咗「Deemed Licensee」續牌之亂後，引來業界唔少迴響，甚至連保監局都有回應，主動同業界講如果任何續牌人士喺學歷認證問題上遇到困難，例如內地學歷認證、遺失畢業證書之類，都好歡迎搵佢哋幫手，會盡力提供認證方面嘅協助。

有大隊長就話保監局今次主動提出幫手，相信可以幫到唔少喺搵證書方面遇到困難嘅續牌人士，而且講到明點處理都好，大家唔使再估估吓，如果學歷真係「堅」嘅話，就一定有辦法搞得掂。不過，如果學歷「有問題」嘅話，大家就要三思而後行喇，費事適得其反！

提到今次「Deemed Licensee」登記，仲有好多大隊長都提出一個疑問，就係點解保監唔接受第一張學歷以外嘅更高學歷呢？其實呢個係一個邏輯性問題嚟。好喇，我哋先假設有一個保險中介人，當年佢入職嗰陣張學歷係有問題嘅，不過當時無查得嚴謹過咗關，咁畀佢成功入職，但佢之後都生生性性，好快繼續進修拎到更高學歷甚至大學畢業，咁佢一定可以勝任啦係咪？

咪住先，大家唔好忘記「至高誠信」呢個「終極」要求。保險中介人註冊嘅學歷要求，係法例一部分嚟，如果當年第一張學歷有問題，咁佢第一日開始已經唔應該做到中介人，所以佢嗰段期間賺到嘅錢都係唔合法，就算之後第二張學歷係OK，但都唔會改變到之前唔合法嘅事實，永遠都達唔到「至高誠信」嘅要求。

咁唔通中介人就唔可以有一個改過自新嘅機會咩？喺現行中介人要求方面，除咗學歷要求之外，對有刑事案底同破過產嘅人士，都無明文規定唔可以註冊成為保險中介人。唔通幾廿年前張學歷有問題嘅話，仲嚴重過有刑事案底？

「更新」計劃有得諗？

所以保險中介人「更新」計劃，會唔會都有得諗呢？既然監管機構無話過犯過事唔可以來申請，會因應個別情況去考慮。如果個Agent真係辭職唔做，兩年或三年後，再重新考試，更新一張新學歷，到時保監問點解第一張唔再用，會唔會都可以個別考慮呢？

既然講得出個別考慮，有大隊長就建議，不妨幫多啲保險公司做慈善、培訓之類嘅義工，等到時去保監申請續牌嘅時候，拎多幾封推薦信呈上去，證明即使佢第一張學歷有少少問題，但之後已經取得認可更高學歷之餘，仲係行業作出咗好多貢獻，咁樣或者都有機會過關都唔定。

不過都係嗰句啦，如果誓神劈願個學歷係「堅」，就即管搵保監幫手認證啦！但係自己心知肚明有啲「問題」嘅話，最後出咗事就邊個都愛莫能助，咁就真係要諗清楚喇！

保寶達人 – 為您八盡保險天下事

更多保寶達人手記Click Here