提防保險桃花劫？交友App搵下線賣保險實錄

網上交友一直都好流行，由以前嘅即時通訊軟件，都而家擺明車馬識朋友嘅五花八門交友App，喺網上認識異性變得越來越方便，有唔少轉數快嘅Agent都會嘗試網上交友，搵姻緣之外仲搵埋生意，咁當然有人成功簽到單同搵到下線，但保寶達人亦聽到唔少Case最後引嚟桃花劫。

最識用交友App搵生意嘅，肯定係班後生仔。唔少大隊長旗下都有唔少廿零歲嘅新入行Agent，交友App用到出神入化，傾計打字快到無影，咁都無可厚非嘅，交友App對佢哋嚟講好平常，未入行前已經成日用，當然唔好浪費咗呢個客源。有大隊長就分享佢團隊有位身型高佻嘅保險Oppa，用交友App成功請到7個下線，仲要全部都係女，真係甘拜下風。

不過交友App龍蛇混雜，點會個個玩嘅都有咁好成績，保寶達人就聽過另一個案，個男Agent最擅長用交友App識啲中年女客戶，雖然佢開宗明義係sell保險，擺明無興趣搞姊弟戀，但都慰藉到唔少姐姐嘅「寂寞的心」，成功促成一啲生意。

偷雞唔到蝕渣米

佢有次識到個離婚中年女性，因為大家都有養狗，於是關係變得親近，慢慢仲成功賣埋單，對方一出手就買咗張百幾萬嘅基金單，真係幾禾味，後來個客仲幫個仔買多一份基金單，供廿幾萬一年，點知供咗3年左右就無再供，之後畀保險公司Cut單，咁就梗係拎唔返投資咗嘅全部資金啦，於是個客就開始變臉喇，投訴話係個Agent叫佢唔使交喎，最後保險公司退還返保費，個Agent就停牌年半。好喇，辛辛苦苦等到復牌，以為件事告一段落啦，點知又收到通知要去警署接受調查，原來呢個客再告佢冒簽一份免做FNA嘅文件。個Agent就誓神劈願咁話真係客戶自己簽，仲搵埋律師同筆跡鑑定專家，雖然最後真係告唔入，但係咁樣畀人咬住唔放，都已經元氣大傷。

人類總是犯同樣的錯誤，所以交友App又好、網上交友又好，甚至正常途徑識都好，一旦有感情瓜葛就一定要小心。有大隊長就話，當年初入行啲前輩教嘅第一件事，就係盡量唔好搵另一半簽單，如果只係男女朋友就更加試都唔好試，因為第日唔知因乜事反面分手，可能佢真係走去告你都唔定，就算告唔入都一身蟻，為咗一張單搞到咁就唔抵啦！

保寶達人 – 為您八盡保險天下事

更多保寶達人手記Click Here