獅王回歸?投連險市場再起風雲

今次轉講返最近發布咗新指引嘅投資相連壽險(投連險/ILAS)。大家都知證監會經已發布咗ILAS嘅附加指引,日後新出嘅ILAS產品,產品設計要公平合理、費用與所提供保險保障相稱,保險費用率同基金平台收費亦收緊咗限制,而新申請嘅產品必須符合附加指引要求先會獲批,現有產品就有18個月過渡期去修改,符合要求先可以繼續銷售。

 

而家市場上最流行嘅ILAS產品簡稱105,代表提供105%嘅人壽保障,但唔知大家仲記唔記得,其實舊版ILAS係只有101%,當年就曾經畀保監處下令作出結構性修改,特別係針對保單費用同退保費用,但之後就一路都冇乜太大嘅修訂。

 

既然ILAS咁多年來一直都相安無事,因乜解究會畀證監會盯上呢?其實答案就藏在最新保險行業數據當中。

 

一直以來銀行都會賣埋保險,不過有一種保險產品銀行向來都只係得個睇字。無錯!之唔係今次「被改革」嘅主角ILAS囉!好多年前,金管局曾經對ILAS產品發出銷售指引,令一班銀行衡量過後,選擇退出ILAS市場。

 

ILAS市場近年發展得唔錯,截至今年6月底,本港投連險保單有120萬張,保單價值3,050億港元,而且新造保費仲不斷係咁升,早排保監局公布今年第三季行業數據,ILAS相關新造保單保費達85億,比上一季再升19.7%。要知道2020年ILAS新造保單保費只有128億,而今年頭三季經已錄得超過200億,睇嚟今年埋單肯定至少升一倍有多。

 

睇住咁多投保人將資金投入ILAS產品,一直「作壁上觀」嘅銀行想法當然有所改變。有媒體就透露話喺新指引下,銀行有望重返ILAS市場,因為獅子銀行喺今次證監會嘅ILAS諮詢過程中出咗好多力喎,咁大家明啦!

 

保寶達人 – 為您八盡保險天下事

更多保寶達人手記Click Here