【保寶達人】保單融資有伏？無事由自可 有事死鬼咗

近年超低息環境下，好多人鍾意收息投資，令有槓桿效應嘅保費融資（Premium Financing）呢幾年喺行內好流行，保寶達人甚至聽過有人游說客戶按咗層樓套現來做。乜保費融資真係咁筍咩？究竟有乜嘢「伏位」投保人同Agent係需要注意？

簡單咁講，所謂保費融資係指透過槓桿方式買Saving單，將保單當成抵押品借貸，貸款成數可以高到9成都唔出奇，因為咁先達到以小博大嘅效果。以前呢啲通常係私人銀行級數客戶先會玩，雖然近年門檻有所降低，但係一個月入幾萬嘅普通打工仔，點解都可以「越級」買到千萬大額保單呢？詳細操作保寶達人喺呢度就唔評論喇，想知嘅一定有辦法搵到，今次只係想提醒一下當中嘅風險。

過高槓桿要提防

講真保費融資唔可以話係「伏」，畢竟係一種市場認可嘅投資產品，唔可以抹殺呢啲產品對某部份願意接受風險嘅人係有存在嘅價值，只不過涉及高槓桿，一定要小心提防，好似市場上曾經有啲好誇張嘅甚至做到1:9，比較負責任嘅公司係或者只做到3:7。

係最理想嘅情況下，保費融資的確可以幫投保人帶來可觀嘅利潤；但係如果投資環境逆轉，預期回報不似預期，就可能會令資金鏈斷裂，為投保人帶來重大虧損，甚至如果係單冚單，無錢支付貸款利息，唔止賺錢大計落空，通常未夠5年中途退保，價值會有一定損失。

所謂食得鹹魚抵得渴，玩得高槓桿嘅客戶，都要明白同承擔返以上嘅風險，所有風險一早白紙黑字寫明，無得輸打贏要㗎嘛！

至於Agent嗰邊，處理保單融資需要有一定經驗，否則一知半解或心急追數，好易變咗Hard Sell，只講回報唔講風險，咁就好容易出事，如果畀人捉到FNA或者銷售過程出咗問題，仲可能搞到一身蟻，隨時連個牌都無埋。

查實保寶達人點解今次會講保單融資呢？咪就係之前夜晚睇電視，睇到有感而發囉（明嘅就明）！人生如戲，好多時件事未必好似大家表面見到咁，又可能呢一、兩個有問題Case，只係冰山上面嘅一小角，下面係好大舊好難撼動嘅大山。

總之作為Agent，特別係保險代理，做保費融資真係要好小心，究竟有咩係可以做，有咩係唔做得，一定要心水清啦！

保寶達人 – 為您八盡保險天下事

更多保寶達人手記Click Here