【保寶達人】保險豪門宴爭啲出事？改線上開年大家點睇？

第五波Omicron疫情大爆發，尤其政商界人士而家聽到「豪門宴」三個字都嚇一嚇，鬼咩！大家都怕孭鑊，雖然唔似班達官貴人咁見晒報，但如果出席宴會畀人認出，喺網上畀人公審都唔好啦！

上星期撞到幾個大隊長，大家不約而同咁講起某大保險公司一位DD（區域總監），話說佢喺1月初收緊限聚令之前，率領團隊喺北角一間高級中菜舉辦周年晚宴，點知某YouTube Channel就收到報料，話有出席者喺社交平台上載當晚相片，仲留言：「趕在限聚前的一晚舉行區域的年終Annual Dinner。」

「豪門宴」單嘢爆出之後，呢啲晚宴當然就成為關注對象，有啲行家就好勞氣，話當時社區已經出現多條Omicron隱形傳播鏈，擔心如果晚宴出席者入面有人「中招」，就好可能爆出「保險群組」，後果不堪設想，批評有人一意孤行，堅持要舉辦係不負責任。不過又咁講，都有行家話周年晚宴一早籌備好，如果臨時先取消損失好大，況且當晚的確仲容許有晚市堂食，所以唔可以話佢錯晒。總之，最緊要係最後大家冇事，不過奉勸所有大隊長喺而家嘅非常時期，一定要加強防疫意識，而且唔單止搞活動嗰陣要，連平日喺Office都一樣要。

皆因年尾Annual Dinner之後，好快就到農曆新年「開年」，為咗減低同事接觸嘅機會，好多保險公司都相繼收緊防疫措施，有某「保號」就話開年唔畀同事喺Office飲食，有大隊長就話咁即係冇得開年啦！因為Omicron來勢洶洶，如果團隊唔按照公司指示做，冇事由自可，一旦出事就要孭鑊，所以一收到公司指示，就嗱嗱聲去取消隻燒豬咁話。

至於另一間「有人幫」公司，甚至唔鼓勵同事返Office開年，提議啲大隊長喺線上開年，派利是就改用「線上抽利是」方式，不過大隊長們都好明白同合作，因為只要團隊有一個同事出事，成個辦公室都要Close，到時損失由邊個負責？因為簽租約嘅係公司，Agent團隊必須要跟足公司指引，有公司甚至連分AB Team都嚴格要求，A Team返足一至五之後，周末全Office進行消毒，B Team接力再返一至五，之後繼續輪換，話咁先可以確保一旦有人出事，唔會交叉感染喎！

聽日就新年，不如各位行家都分享吓團隊點樣「開年」？

保寶達人 – 為您八盡保險天下事

更多保寶達人手記Click Here