【保寶達人】風水輪流轉 IANG返內地掛牌大翻身！

疫情呢兩年一直封關，無晒內地訪客生意，唔少喺保險業發展嘅「港漂」都續唔到IANG簽證，選擇返內地另謀發展，但原來當中有啲返咗內地之後繼續做保險，仲撈得風生水起添！

年初當大家憧憬開關有望時，點知第五波疫情大規模爆發，正式通關就未有耐喇，咁唯有靠「曲線」通關頂住先。保寶達人上年8月已經寫過《兩地掛牌疫下翻生 澳門射單過香港》，而家好多公司都等唔住，都開始行「澳門簽單」呢條路，不過「表面上」唔會話計佣金，而係用介紹費嘅形式，因為如果喺澳門「射」張單去香港，澳門政府肯定唔會贊成，因為佢哋認為呢張單係澳門單，應該入澳門數，不過可能而家規模唔算太大，所以「隻眼開、隻眼閉」就算。

最近保寶達人收到路邊社消息，話呢類兩地掛牌玩法仲有升級版！講說某A字頭保險公司喺內地同商業龍頭銀行簽咗合作協議，喺內地用旗下Broker公司名義組織咗一支In House Agent團隊，高薪挖咗一批香港嘅IANG返去掛牌，聽聞有過兩萬蚊底薪。呢班以前喺香港掛牌嘅IANG，主力做內地訪客生意，表現一直唔錯，而家就轉咗返內地做，不過主要客戶群都係同一班。

而家可以話係「風水輪流轉」，估唔到之前仲一直捱緊嘅港漂IANG，近期成為內地銀行同保險公司嘅搶手貨。有內地銀行同保險公司講明只請香港嘅IANG，當然佢哋唔會公開咁講，覺得呢班IANG有內地人脈網絡，熟悉內地市場同香港市場，擁有香港市場經驗再去內地銷售會更加有優勢，到第時通咗關之後，內地同香港兩邊茶飯都食到，所以好吃香。

疫情下，好多專做內地生意嘅團隊Leader都喺度諗，與其守株待兔等通關，係咪可以喺內地做一啲好似澳門簽單咁嘅業務擴展呢？不過呢類跨境操作都有一定爭議性，好似上年某大保號就發生咗一單大嘢，炒咗一、兩個區域總監，原因係佢哋私下喺內地登記開咗間Agent公司，喺香港請IANG返上去掛牌，但係畀保險公司上頭知道咗，因為事發保險公司嘅Contract寫明只可以喺香港登記，亦唔可以自己喺出邊開同保險相關嘅公司，於是決定即炒。

聽聞唔少香港嘅保險公司都相應作出行動，對喺內地有呢類活動嘅同事都會揸正嚟做，作出懲處，究竟係咪真有其事呢？相信只有內部嘅人先知喇！

保寶達人 – 為您八盡保險天下事

更多保寶達人手記Click Here