【保寶達人】危疾保納入扣稅項目 助推「全民健康保障」有無得諗？

就到6月，又到報稅嘅時候，相信大家都知政府近年推出咗「扣稅三寶」（自願醫保、可扣稅自願性供款、合資格延期年金），提供一啲「甜頭」，鼓勵市民及早做好退休同醫療保障，好多客戶同行家都有用，如果計好條數，每年可以慳到成萬蚊稅。

嚟緊新政府將會組班，聆聽社會各界嘅意見。保寶達人就覺得，保險業界嘅聲音係好重要，因為保險係人生最重要嘅保障，政府想推動退休規劃同醫保，保險業界都扮演住重要嘅角色，好似強積金制度同自願醫保就係好例子。

好多人唔知，「扣稅三寶」其中一寶「自願醫保」，其實原本係諗住做成強制性嘅「全民醫保」，但係之後因為各種原因，先變成而家嘅自願性投保，但係明顯政府都想透過提供誘因，吸引更多人投保，所以先有扣稅優惠。先唔理強制定自願，香港面對人口老化，為市民提供某程度上嘅「全民健康保障」係值得做嘅，問題係點樣做到，或者做到幾多。

不過，實報實銷嘅醫保只係個人醫療保障嘅其中一個層面，有大病除咗要支付一大筆醫療費用（私家），停工治療仲會影響工作生計，所以市場上就有危疾保障，兩類保障相輔相成，先至提供到一個完整嘅醫療保障網。咁既然自願醫保有得扣稅，點解危疾保唔得呢？多咗人購買危疾保，有事可以得到現金賠償，生活唔使太過擔心，變相都會鼓勵更多人採用更好嘅私家醫院服務，一來得到更好嘅照顧，二來減輕公營醫療系統負擔。

而家公營醫療系統已經超負荷，如果病人患上大病引致嘅負擔，可以透過危疾保交畀保險公司分擔，除咗本地保險市場會擴大，長遠對大灣區政策發展都有幫助。內地居民有社保，當中就包括基本醫療保障，如果香港都有類似嘅機制，將來可以有助大灣區融合，對本地業界發展亦有好處。

更加重要嘅一點，係第五波疫情令到更多市民更加關注危疾風險，連時機都配合到。所以話，將「扣稅三寶」變成「四寶」，絕對有得諗！

保寶達人 – 為您八盡保險天下事

更多保寶達人手記Click Here