內地訪客回歸！升勢有望持續？

保監局上月底公布咗2024年香港保險業嘅臨時統計數字，生意額明顯好過2023年，全年毛保費總額衝到6,378億港元，成績相當亮眼。最開心嘅係，疫情後驟減嘅內地訪客有回歸跡象，再次成為香港保險業嘅強大支持。

無可否認，內地訪客嘅回歸真係令香港保險業重拾動力。去年嚟自內地訪客嘅新造保單保費錄得628億元，比起前年升咗6.5%！涉及金額係2016年以嚟最高，仲要喺第四季度一口氣衝上161.54億元，按年上升超過33%添！

單單係內地訪客嘅新造保單，已經佔咗2024年個人業務總新造保單保費嘅28.6%，咁好嘅成績，背後梗係有原因啦。有業內人士就估計係因為人民幣息率偏低，令好多內地訪客都諗住將資金轉做港元或者美元嘅保險產品，尋求更好嘅回報。

至於內地訪客最鍾意邊類型嘅保險產品呢？答案依然係終身壽險，成59%嘅生意額都係嚟自呢類產品。第二受歡迎就係危疾保險，佔28%；醫療保險就佔5%。最值得留意嘅係，大部分內地訪客都揀非整付方式支付，即係話佢哋都願意長期同香港嘅保險公司建立關係。

除咗內地訪客，本地嘅長期保險業務都做得好好。全年新造保單保費衝上2,198億元，大升21.4%。其中非相連個人業務錄得2,081億元，升幅22.8%，分紅業務更加做到1,824億元。呢啲數字背後反映咗乜嘢？就係話香港人依然對保險有相當大嘅需求，而除咗保障意外，喺低息環境下，分紅產品嘅回報亦相當受歡迎，相信呢啲因素都係帶動業務增長嘅原因。

一般保險業務方面都有增長，全年毛保費同淨保費分別有1,005億元同697億元。最重要係整體經營利潤有81億元，反映業務質素良好。

睇住而家嘅大好形勢，保險從業員真係要好好把握機會。由於預期人民幣息率暫時都會維持偏低水平，加上香港金融市場嘅優勢，相信內地訪客嘅需求只會有增無減。同時，我哋都要諗下點樣可以將服務做得更加好，令客戶更加安心嚟香港投保。

所以總括嚟講，香港保險業喺2024年可以算得上係豐收嘅一年。最值得開心嘅係見到行業充滿朝氣，內地訪客嘅回歸令香港重新確立咗作為區內保險中心嘅地位。大家記住把握呢個展現專業實力嘅好時機。記住，機會係留畀有準備嘅人，大家務必好好裝備自己，為客戶提供更加優質嘅服務！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。