【保寶達人】疫後IANG新生態 返內地掛牌有唔錯嘅底薪真係咁筍？

呢兩年畀保寶達人最大嘅感受，係疫情前後香港保險業變化真係好大，其中一個最大分別，係內地訪客生意冰封兩年，令主力做內地生意嘅IANG團隊大變天。

回想起幾年前，IANG團隊風光無限，獎項拎到手軟，又買車又買樓，而家諗真啲，內地訪客業務其實本質上只係帶個客落香港簽單，Agent同客都唔係喺香港扎根，只有張保單喺度。所以呢兩年經歷完汰弱留強後，只有少數能夠喺香港扎根嘅IANG先可以生存，其餘有啲一早頂唔順封關返咗家鄉同屋企人團聚，有啲收入根本唔夠續期，最終都係無奈返內地另謀發展等等。

IANG生存空間要視乎行業生態環境有無提供機會畀佢咃，其實通關都傳咗好耐，各間保號都想盡量挽留佢班IANG，有部分仲特登諗計幫佢哋「轉移陣地」添！講緊係上年有內地龍頭銀行同某保號合作，喺香港招募做開保險嘅IANG，喺內地以銀行旗下Broker公司名義組織嘅In House Agent團隊，掛牌做內地客生意。聽聞挖角Offer唔錯，底薪對佢哋嚟講相當吸引，而且客戶同以前一樣都係同一班人，咁的確好過留喺香港等通關。

不過呢類跨境操作都有一定爭議性，好似上年某大保號就發生咗一單大嘢，炒咗兩個區域總監，原因係佢哋私下喺內地登記開咗間Agent公司，喺香港請IANG返上去掛牌，但係就畀團隊上司知道咗，所以驚動到保險公司高層。

當然唔少保號對喺內地有呢類活動嘅同事都會揸正嚟做，作出懲處，前題係如果真係查得到的話，因為要喺內地查登記資料都唔係咁容易。其實呢類Case揸唔揸正嚟做，好多時都視乎團隊上司嘅取態，有啲可能都會體諒同事要搵生存空間，隻眼開隻眼閉，但無論點都好，違規就係違規，所以做事都唔好太過High Profile先啦！

保寶達人 – 為您八盡保險天下事

更多保寶達人手記Click Here