【保寶達人】識買保險可避免「天線得得B關公災難」？

「關公」同「天線得得B」原本大纜都扯唔埋，但只係短短一日，「天線得得B關公災難」引發全城洗版。今次保寶達人唔係抽水，只係想講其實好多呢類日常生活發生嘅小意外，如果事先識得運用保險將責任轉移，就可能避免到一場關公大災難。

打開門做生意，咩意外都有可能發生，所以唔少商家都會買商業保險例如商舖保險，特別係店內有貴重貨品嘅。呢類保險會保障店內財物因火災、盜竊或意外受損，至於賠償額多少就視乎保額同保單條款。如果店內有高價貨品/貴重動漫人物展品之類，仲可以向保險公司額外申請貴重物品保障，保險公司會做估價再報價。所以如果店方有做足呢啲保障，就算發生同類「挨跌」意外，都可以話係「立於不敗之地」。

至於唔小心引致意外嘅顧客，靠保險都有對策。市面上有部分家居保險產品，住戶嘅家庭成員包括年幼子女都受保，而除咗保我哋一般以為喺家中發生嘅意外，第三方責任保險有機會保障任何意外損毀，視乎保單條款，就算意外喺家居範圍以外發生，亦有可能喺保障範圍之內。

不過最終都要留意保單條款字眼同索償要求。因為呢類保險通常寫明只保意外，如果有證據顯示係故意引致損毀就唔會賠，同埋第三方責任保險係要有法定責任先會賠償，如果自己先認錯先賠錢，保險公司一般都唔會賠。仲有一點要留意，根據香港法例，10歲以下兒童係毋須負上法律責任，不過店家可以起訴涉事家長疏忽引致財物損失，呢方面可能都可以靠家居保險得到保障。

所以話，如果已購買相關保險嘅家庭遇到同類嘅意外，就同揸車「揩」到人哋架車一樣，盡量唔好私了。如果雙方各執一詞，就應該報警，同紀錄低現場相關資料，之後再交畀保險公司處理。

保寶達人 – 為您八盡保險天下事

更多保寶達人手記Click Here