【保寶達人】解開持牌個人保險代理人數一年跌6,000之謎!

根據保監局最新數據,截至今年7月31日,持牌個人保險代理人數有83,034人,聽落好似無乜特別吖,但係如果我話你知係2021年同一時間,人數大約有89,000人。只係大約一年,持牌個人保險代理減少咗近6,000人,究竟呢6,000人去咗邊?急跌趨勢會唔會持續落去呢?

 

要解開跌6,000之謎,其中一個關鍵相信係「Deemed Licensee」,持牌個人保險代理提交新牌照申請嘅Deadline經已係8月初過咗,究竟今次係咪真係「血流成河」?保寶達人都無一個數字,但相信真係有部分拎唔到當年個學歷證明出嚟,過唔到「Deemed Licensee」續牌;加上因為疫情問題IANG保險代理有好多經已返咗內地做緊另一份工,疫情到而家,保險達人亦都聽過好多大隊長分享有同事因為落唔返嚟香港,最終選擇喺內地搵工做,最後「遙距」辭職,為香港保險生涯劃上句號。

 

至於另一個關鍵原因,一定係移民潮,因為唔單止客戶移民,連Agent自己都移民。有大隊長就話,最近叫啲走咗嘅同事上網上CPD課程都唔肯,因為佢哋諗住自己以後都唔會返嚟。佢哋去嘅地方唔止英國,仲有澳洲、加拿大、新加坡,通常係30歲左右、子女剛入學嘅年輕同事。

 

其實一直以來,保險中介人人數有升有跌好正常,以前有人走,仲有好多人想加入,只要入多過出,最後都會變返正數,好似2017至2021年呢幾年,持牌個人保險代理一路由64,000左右升到89,000人最高峰,原因就係咁解。

 

但係今時唔同往日喇,而家產品更多元化,客戶對保險中介人的要求亦高咗,行業要走專業化,環境係咁,同業就要與時並進。近年招聘都愈來愈困難,招募大學畢業生係比較容易,但受到疫情封關影響,內地來港人士業務陷入停頓,以前做開內地人生意嘅團隊生意差咗好多,單靠本地市場撐住,但今年上半年疫情高峰時,大家都唔能夠面對面見面,對新人來講,要站得住腳真係唔容易,入行幾個月都做唔到成績而Quit嘅都唔少。

 

有大隊長就預言,移民潮持續,幾時通關又未有定案,再過一排可能又有幾千人走,到今年年底持牌個人保險代理人數可能跌穿8萬都唔定。

 

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等,並未代表保協之立場。