【保寶達人】綠色保險係乜傢伙?相關專業資格有得諗?

ESG(環境、社會及管治)相信大家都聽過,呢個可以話係近年成個金融界最Hit嘅關鍵詞,以往通常講緊純投資,同壽險唔算有好大關係,但最近市場上開始出現標榜係「綠色保險」嘅產品,如果想跟上呢個市場大趨勢,保險從業員都要對ESG同綠色保險有一定認識先得。

 

綠色保險係咩意思呢?大致可以分為兩種,第一種係指同環境風險管理有關嘅各種保險,對象係企業,例如由保險公司對污染受害者進行賠償嘅環境污染責任保險,不過呢類保險喺歐美比較流行,喺中國內地亦只係剛剛開始發展嘅階段。

 

綠色保險另一個意思比較貼近一般消費者,就係融入綠色或者ESG元素嘅保險產品。簡單嚟講,大家都知保險公司收咗投保人嘅保費,會拎去做唔同嘅投資,因為個基數夠大,可以投資到各色各樣嘅投資工具,當佢哋投資賺到錢,公司先可以穩妥營運落去,同埋有儲蓄功能嘅派息產品,啲息都係靠投資得嚟。而標榜有綠色同ESG元素嘅產品,一般列明有一定比例嘅保費會投資喺認可綠色投資工具,同埋唔會主動投資一啲對環境或社會有害嘅行業,例如軍火、煙草之類,嚟吸引一啲有相同理念嘅投保人。

 

早前就有保險公司標榜推出市場上第一個主打ESG嘅儲蓄保險產品,同全港首個獲獨立第三方認證嘅綠色保險產品,相信呢啲「第一個」、「全港首個」將會陸續有嚟,因為當有保險公司行出第一步,其他同業都會有所動作,可以肯定市場上嘅綠色保險產品將會愈來愈多。

 

另一方面監管機構都推波助瀾,好似保監局規定新產品「保障型投資相連壽險」(PLP)嘅投資選項當中,一定要有最少一項係證監會核準嘅ESG基金畀客戶選擇,所以可以預期ESG或者綠色元素,未來喺保險產品入便嘅比例會愈來愈高。

 

保險從業員一向都好跟得上行業環境轉變,好似而家行業已經有唔少理財策劃方面嘅專業資格。咁既然未來綠色保險會成為大趨勢,專門為保險從業員而設嘅ESG或綠色保險相關專業資格真係有得諗,一啲行業協會都可以認真研究下,其中「保協」就相當積極,早前拎咗環保促進會─聯合國可持續發展目標機構獎,嚟緊仲會同環境社會及企業管治基準學會合作舉辦ESG講座,畀從業員了解更多綠色保險發展。

 

保寶達人 – 為您八盡保險天下事

更多保寶達人手記Click Here

 

任何於本文章的評論或意見純屬來自個別嘉賓/隊長等,並未代表保協