【保寶達人】一文睇晒《香港保險認知研究》啟示與機遇

有留意行業發展嘅行家，相信會知道保監局8月底發表咗《香港保險認知研究2021》結果，有關研究項目集中評估香港人喺作出與個人保險有關嘅重要決定時應具備嘅知識、技能、態度及行為。

簡單總結，受訪者嘅整體保險認知分數係52%，表示香港市民嘅保險認知程度屬於中等。而喺知識、態度、行為方面，分數就分別係55%、54%及48%，反映港人喺呢三方面嘅認知程度都屬於中等，但其中「行為」嘅認知程度就相對較弱。

研究對於保險中介人有乜啟示呢？喺對保險嘅態度方面，分數有54%，受訪者普遍同意保險對所有人都係重要嘅風險管理工具，而當中有超過一半信賴保險中介提供嘅意見，以及保險公司喺經營業務時能滿足佢哋嘅需要，不過太多選擇同資訊亦令到受訪者難以從唔同產品當中作出選擇。

今屆研究指有一半以上嘅市民信任保險中介人嘅意見，可以話係一個值得鼓舞嘅現象，因為以前有唔少人都會用有色眼鏡睇保險代理同經紀，但係經過業界同監管機構多年嚟嘅努力之後，專業性已開始逐漸為市民所接受。

研究對保險中介人嘅另一個啟示，就係整體分數屬於中等，代表市民對風險敞口同保障嘅知識仲有唔少提升空間，而喺分數較低嘅「行為」方面，投保人一般有以下行為問題：過度依賴家人或朋友嘅意見、對購買保險猶豫不決、購買保險或續保前甚少貨比三家、容易受市場推廣影響，以及忽視保單條款及細則。

保險中介人係解決以上行為問題方面，就顯得非常重要喇！買保險係一個好重要嘅決定，最好係搵專業且有牌照嘅保險中介人提供意見，如果有埋業界以「誠信」為準則嘅獎項，好似保協嘅MTA（卓越誠信顧問大獎）行業獎項同CTA行業認證，就更加令人有信心。專業誠信嘅顧問能夠幫手解答有關投保嘅問題、耐心講解保險產品條款等，所以保險中介人喺提升保險公眾教育同提供專業顧問服務方面，係可以發揮好關鍵嘅作用，絕對唔只銷售產品咁簡單！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。