【保寶達人】網上刷單騙案急升 保險從業員屬高危一族？

早排大家都談論柬埔寨「賣豬仔」事件，市民對於網上求職廣告都警覺咗好多，對於叫人去東南亞工作嘅可疑廣告，個個都耍手擰頭。咁唔使出國，留喺屋企做嘅兼職就安全喇卦？

有大隊長就分享，近期唔少新聞指「網上刷單」騙案呈上升趨勢，而且有唔少苦主竟然係一向精打細算嘅保險從業員！而且唔係講緊損失幾千蚊喎，係幾十萬甚至百萬以上都有！

呢類騙案大同小異，通常受害人收到招聘廣告，受利誘而擔任「網上刷單員」。騙徒會聲稱刷單員只需要喺購物平台點擊購物，推高商家名氣，就可以賺到佣金。如果就咁聽，要先網上刷單，真金白銀買咗件貨，之後先連本帶佣金畀返你，聽落已經好可疑，點會有人中招吖！

當然，騙徒梗係有辦法令受害人上釣。為咗放長線釣大魚，騙徒通常會叫受害人刷單買平嘢開始，之後畀返少少甜頭，頭一、兩次做完刷單指令付款之後，好快就會收回本金加佣金，增加信心之後，騙徒就會要求受害人參與更高價值嘅刷單任務，甚至三連刷或五連刷都有，但佣金都會提高到10%以上，成功誘使受害人支付大筆款項到騙徒嘅帳戶之後，騙徒當然就會即時失聯。

保寶達人就覺得，呢類兼職只有好得閒嘅人先適合，的確疫情期間有部分保險從業員無乜客見，自然有少部分人為咗賺少少外快，會畀呢類廣告吸引到，所以行家除咗唔好咁易信可疑網上招聘廣告，最重要係積極去「開單」，而唔係「刷單」，咁先至搵到真銀，又唔會怕畀人呃！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。