【保寶達人】內地訪客生意反彈！新造保費爆升2000%不是夢

大家有無發覺，早排Lunch行過流動檢測站，總會見到幾個著晒Suit Set晒頭，一睇就知係做保險嘅，相信佢哋係去做核酸測試準備返內地，雖然根據最新措施，而家已經唔再需要核酸測試要求，但都反映咗內地訪客生意真係反彈緊！

不約而同，呢排出席業界春茗遇到唔少大隊長，大家都對內地訪客生意重臨好期待，保寶達人就問佢哋，既然IANG係促成內地訪客生意嘅Key Player，但過去3年有唔少IANG離開保險圈，究竟而家行業夠唔夠有內地背景嘅人才，迎接同服務復常嘅內地訪客生意。

有大隊長好坦白咁講，之前團隊的確流失咗唔少IANG，但係呢班疫情期間返咗內地嘅IANG，喺中港通關之後已經有唔少選擇回流，另外香港每年亦有新嘅非本地畢業生留喺度發展，佢哋亦係而家重點招攬嘅人才。

如果大家有留意微信公眾號，會睇到各大保號同Agent團隊，經已展開咗新一輪嘅搶人才攻勢，唔少以非本地畢業生為對象嘅講座接二連三舉辦，好明顯係想為團隊補充新血。當然，大隊長估計要返到2016至2018年嘅IANG輝煌時代，肯定唔會係一年半載可以做得到，最近全面通關只係第一步，生意需要時間逐步復常。

但對於今年內地訪客生意新造保費，大家都一致認為會有爆炸性嘅增長。因為2022年嘅基數實在太低，雖然保監局仲未公布2022統計數據，但上半年內地訪客新造業務保費只有5.4億，預計成年都係10億上下，唔好話同高峰期5、600億比，如果今年彈返到200億，升幅都講緊20倍，即係2000%！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。