【保寶達人】香港保險交流團赴南沙考察 見證保險售後服務中心「入直路」

自從「跨境理財通」實施之後，而家中港理財產品已經可以互通，但係仲未包括保險產品。雖然內地訪客而家已經可以重臨香港投保簽單，但係對於促進粵港澳大灣區保險業互聯互通，真正嘅「跨境保險通」先至係重中之重。

係人都知大灣區保險業有好大發展空間，但係之前幾年受疫情封關影響，好難做到深入交流。所以全面通關之後，香港保險業即刻組團積極探討灣區發展，好似上月底保協（LUAHK）就牽頭帶領香港9個保險行業協會同其他專業團體代表北上考察，保寶達人亦有幸掹車邊跟團，親身見證今次中港兩地保險業界重要嘅交流同會面。

有「灣區之心」之稱，內地重點發展嘅廣州南沙，係考察嘅第一站，今次交流團仲獲安排同南沙政府金融相關部門會面，了解南沙發展金融業嘅最新政策，當中包括扶持保險業政策。至於「入直路」嘅保險售後服務中心，而家估計今年內，港澳保險業就可以喺內地設立保險售後服務中心，而廣州南沙正正係可選擇嘅地點之一。顧名思義，售後服務中心就係為已購買港澳保險嘅內地居民或港澳居民提供保單諮詢、續保、理賠等一系列服務嘅保險仲介機構，亦可以話係實現「保險通」嘅關鍵第一步。

國務院《廣州南沙深化面向世界的粵港澳全面合作總體方案》明確指出積極支援廣州南沙參與粵港澳大灣區保險服務中心設立，同時要喺跨境車險、跨境醫療險等方面先行先試。未來當有更多跨境保險試點計劃出台，進一步推動跨境合作，香港保險業就可以進一步打通內地市場，擴大喺內地嘅發展空間，而內地保險業亦可學習香港經驗，成就互惠共贏嘅新局面。

唔單止保險業有望加強聯繫，支持初創亦係南沙深化同港澳合作嘅一個重要方向。今次保寶達人仲隨團參觀咗南沙「創享灣」，入便有多個港澳青年創業基地平台，其中就有由港商出資嘅平台，整個辦公室空間都係港人熟悉嘅環境布置，服務人員亦同聲同氣，吸引咗唔少港澳青年到南沙創業同就業，佢哋除咗有額外月薪津貼、港人港稅之類嘅優惠政策，仲可以平租公寓，一房月租可以低至700元人民幣，而且配套設施齊全。南沙配套咁吸引，如果保寶達人後生十年，都想上去闖一闖呀！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。